Samsung ընկերությունը 2012 ֆինանսական տարվա երկրորդ եռամսյակում ստացել է 5,19 տրիլիոն վոնի (4,53 մլրդ դոլար) շահույթ: Այս մասին հաղորդում է Associated Press-ը` հղում անելով Samsung-ի ներկայացրած եռամսյակային հաշվետվությանը:
Անցած տարվա նույն ժամանակահատվածի հետ համեմատած Samsung-ի եռամսյակային շահույթը աճել է 38 տոկոսով: Աճը հիմնականում պայմանավորված է Galaxy սմարթֆոնների վաճառքով, որոնց նոր մոդելը` Galaxy S III-ը, շուկա է դուրս եկել հենց այդ ժամանակահատվածում:
Սմարթֆոնների թողարկմամբ զբաղվող ստորաբաժանումը ապահովել է ընկերության օպերացիոն շահույթի 60 տոկոսը: Օպերացիոն շահույթը նույնպես ռեկորդային ցուցանիշի է հասել` 6,72 տրիլիոն վոն (5,8 մլրդ դոլար): Հաշվետու ժամանակահատվածում ընկերության եկամուտը կազմել է 47,6 տրիլիոն վոն (41,5 մլրդ դոլար):
Չնայած ընկերության համար ռեկորդային ցուցանիշներին` Samsung-ի հաշվետությունը չի բավարարել վերլուծաբանների կանխատեսումները, որոնք ընկերության համար կանխատեսել էին 5,6 տրիլիոն կորեական վոնի շահույթ: