«Առաջին լրատվական»-ի զրուցակիցն է Կոտայքի նախկին մարզպետ Կովալենկո Շահգալդյանը:
– Պարոն Շահգալդյան, մամուլը գրում է, որ վերջին մեկ տարում տասը անգամ Գերմանիա եք մեկնել և հսկայական շենք-շինություններ ձեռք բերել Համբուրգ և Բեռլին քաղաքներում: Անշարժ գույքի առևտրո՞վ եք հիմա զբաղվում:
– Նախ՝ ընդամենը երկու անգամ եմ Գերմանիայում եղել, իսկ Համբուրգ քաղաքում երբևէ չեմ եղել: Աստված անի, որ չարակամ մարդիկ, ովքեր նախանձում են իմ՝ Գերմանիա գնալուն, անհրաժեշտությունից ելնելով տարեկան մի քանի անգամ գնան Գերմանիա: Եվ եթե որևէ մեկը ապացուցի, որ ես գոնե մեկ անգամ եղել եմ Համբուրգում և որևէ այլ երկրում ունեցվածք ունեմ, ամբողջը նվիրելու եմ իրեն: Չար նախանձը խորտակելու է հայ ազգին: Գերմանիայում չունեմ բարեկամներ, հարազատներ և եղել եմ երկու անգամ՝ ընդամենը կնոջս առողջության հետ կապված. նրա առողջությունը շատ վատ է, նույնիսկ առաջարկում են տրանսպլանտացիա անել: Մենք օրհասական վիճակում ենք, իսկ մարդիկ նախանձում են:
– Նախկին վարչապետ Հովիկ Աբրահամյանի խորհրդականն էիք: Հիմա ինչո՞վ եք զբաղվում:
– Կոնկրետ որևէ բանով չեմ զբաղվում, մանր-մունր բիզնեսներ կան, ինչն ապրելու անհրաժեշտություն է:
– Քանի որ բիզնեսով եք զբաղվում, թանկացումների վերաբերյալ ի՞նչ մտահոգություններ ունեք:
– Բնականաբար, թանկացումները շատ վատ են անդրադառնալու բնակչության կենսամակարդակի վրա, բայց դա գիտեք, թե ինչի հետևանք է: Եվ որևէ մեկը չէր էլ կարող չգնալ այդ քայլին, հարկային օրենսդրությամբ ակցիզային հարկի դրույքաչափերի բարձրացում է տեղի ունեցել, տնտեսվարողներն էլ պետք է կարողանան իրենց շահույթն ապահովել:
– Իսկ քաղաքացու մասին ո՞վ պիտի մտածի:
– Ինձ քաղաքական հարցեր մի տվեք, ընդամենը կարծիքս ասացի:
– Մի՞թե հնարավոր չէր զսպել գնաճը, սուբսիդավորում անել:
– Կարծում եմ՝ դրա հնարավորությունը մեր երկրում չկա: Մենք ԵԱՏՄ կազմում ենք, ունենք ընդհանուր օրենսդրություն, մենք ևս դրա հետ պետք է առնչվենք: Չեմ կարծում՝ եթե կառավարությունը հնարավորություն ունենար, այդ քայլը չէր անի: Ցանկացած կառավարություն՝ լինի Հայաստանի, թե մեկ այլ երկրի, բնականաբար, կցանկանա այնպիսի քայլեր անել, որը կնպաստի ժողովրդի բարեկեցության բարձրացմանը: Եվ եթե չկա այս պահին մեր երկրում դրա հնարավորությունը, ի՞նչ պետք է անել:
– Դրա համար էլ մարդիկ արտագաղթում են…
– Ինչ ասեմ, այդ արտագաղթը այլ երկրներում նույնպես կա:
– Գուցե ճիշտ կլիներ Հայաստանը ԵԱՏՄ-ից դո՞ւրս բերել:
– Սա շատ ծավալուն թեմա է: Եկեք չանդրադառնանք: Հենց այնպես չէր, որ Հայաստանը մտավ ԵԱՏՄ կազմ: Արտերկրում գտնվող մեր բնակչության մեծ մասը ՌԴ-ում է, դրան էլ գումարած մեր երկրից արտահանվող ապրանքի 90 տոկոսը իրացվում է Ռուսաստանում: Դե մնացածը պատկերացրեք:
– Չե՞ք կարծում, որ այս ամենը ի վերջո կհանգեցնի սոցիալական բունտի:
– Խնդրեցի քաղաքական հարցեր չտալ: Կարծիք չունեմ:
