Բրիտանական Reuters լրատվական գործակալության փոխանցմամբ՝ առաջիկա հինգ տարում երկրների միջև ու նրանց ներսում հակամարտությունների առաջացման ռիսկը կհասնի Սառը պատերազմի ժամանակներից աննախադեպ մակարդակի։
Նման եզրահանգման են եկել ԱՄՆ Ազգային հետախուզության վերլուծաբանները։ «Գլոբալ միտումներ. Առաջընթացի պարադոքս» զեկույցի հեղինակների կարծիքով՝ դրա պատճառն այն է, որ ստեղծված աշխարհակարգը քայքայում են հակագլոբալիզմն ու ազգայնականությունը։
Փորձագետները մութ և բարդ ապագա ձևավորող գործոնների թվում առանձնացրել են տարածաշրջանային հակամարտությունները, ահաբեկչությունը, եկամուտների մակարդակի անհավասարաչափ բաշխումը, կլիմայի փոփոխությունը, տնտեսական թույլ աճը, ինչպես նաև Ռուսաստանի ու Չինաստանի քաղաքականությունը։
Զեկույցի հեղինակները նաև ընդգծել են, որ առաջիկա տասնամյակներում աճելու է ահաբեկչության սպառնալիքի մակարդակը, որը բխելու է առանձին մարդկանցից ու փոքրաթիվ խմբերից, որոնք զինված կլինեն նոր գաղափարներով ու տեխնոլոգիաներով։
Զեկույցը հրապարակվել է ԱՄՆ նորընտիր նախագահ Դոնալդ Թրամփի երդմնակալությունից երկու շաբաթից էլ պակաս ժամանակ առաջ։ Զեկույցում հատուկ ուշադրություն է հատկացվում այն ոլորտներին, որոնց վրա նախընտրական կամպանիայի ժամանակ խոստացել է կենտրոնանալ Թրամփը։
Խոսքը մասնավորապես Ռուսաստանի հետ հարաբերությունների բարելավման, Չինաստանի հետ տնտեսական հարաբերությունների վերանայման, ԱՄՆ-ում աշխատատեղերի մեծացման, ինչպես նաև ահաբեկչության դեմ պայքարի մասին է։
