Կառավարության նիստում նախարարներն են եղել՝ վարչապետը դիմել է նախարարներին, լիներ հանրությունը՝ հանրությանը կդիմեր՝ հայտարարել է ՀՀԿ խմբակցության ղեկավար Վահրամ Բաղդասարյանը՝ մեկնաբանելով «պրիմիտիվ գողությունը» դադարեցնելու վերաբերյալ վարչապետ Կարեն Կարապետյանի հայտարարությունը, որ հնչել էր կառավարության նախորդ նիստում:
Վահրամ Բաղդասարյանն ասել է, որ գողությունը մարդկության հետ եկել է, մարդկության հետ էլ կվերանա: Այսինքն՝ ինչ է ասում ՀՀԿ խմբակցության ղեկավարը. ասում է, որ անհանգստանալ պետք չէ, և Կարեն Կարապետյանի հայտարարությունը մարդկության հետ եկած ու գնացող մի հայտարարություն է, որը բոլորովին չի նշանակում, թե գողությունը սահմանափակելու են և գողերին պատժեն: Այլ կերպ ասած՝ ՀՀԿ խորհրդարանական խմբակցության ղեկավար Վահրամ Բաղդասարյանը պարզապես հանգստացնում է գողերին, որոնք կարող էին, իհարկե, անհանգստացած լինել Կարեն Կարապետյանի հայտարարությունից:
Իհարկե, նման հայտարարություններ շատ են տեսել նրանք, որոնք զբաղվում են պրիմիտիվ գողություններով, սակայն ամեն մի նոր հայտարարության դեպքում, իհարկե, միշտ էլ վտանգ կա, որ մեկ էլ տեսար այդ հայտարարությունը տարբերվի նախորդներից իր գործնականությամբ: Իսկ եթե գողերը անհանգստանան, ապա դա, բնականաբար, ինքնըստինքյան ենթադրելու է իշխանության համակարգի անհանգստություն, քանի որ այդ համակարգը գողության վրա հիմնված համակարգ է: Ահա թե ինչու Վահրամ Բաղդասարյանը, օգտվելով առիթից, հանգստացնում է բոլորին՝ ակնարկելով, որ Կարեն Կարապետյանի հայտարարությունը ոչնչով չի տարբերվելու նախորդներից, և բոլորը կարող են հանգիստ լինել:
Բնականաբար, Կարեն Կարապետյանն ինքը չէր կարող մի կողմից՝ անհանգստացնել, մյուս կողմից՝ հանգստացնել գողերին՝ ասելով, որ ժանրի կանոններն են պահանջում անել նման հայտարարություններ նոր նշանակված լինելու պարագայում՝ հասարակության վրա ազդեցություն թողնելու համար: Այդ պատճառով էլ ՀՀԿ-ում հստակ բաշխված են դերերը, և Կարեն Կարապետյանը՝ անհանգստացնում, իսկ ՀՀԿ խմբակցության ղեկավարն էլ հանգստացնում է բոլորին՝ հասկացնելով, որ իրականում գողությունների դեմ ոչ մի լուրջ պաքար էլ չի կարող լինել:
Ինչպե՞ս լինի, եթե մարդկության հետ եկել է, մարդկության հետ էլ կգնա գողությունը: Այդ դեպքում կստացվի պայքար մարդկության դեմ: Այսինքն՝ մարդկության հետ եկած և մարդկության հետ գնալիք բանի դեմ պայքարելու համար պետք է մարդկության դեմ պայքարել: Ու կստացվի, որ գողությունը վերացնելու համար պետք է վերացնել մարդկությունը: Դե, հո չի՞ կարող նոր վարչապետը մարդկությունը վերացնել՝ բառի բուն և պատկերավոր իմաստներով:
