Շիրակի մարզի ընդհանուր իրավասության դատարանը օգոստոսի 23-ին հրապարակեց Ավետիսյանների ընտանիքի սպանության մեջ մեղադրվող Վալերի Պերմյակովի դատավճիռը՝ վերջինիս դատապարտելով ցմահ ազատազրկման: Դատավճիռը հրապարակելիս, սակայն, չի նշվել, թե Պերմյակովը որտեղ պետք է պատիժը կրի Ավետիսյանների իրավահաջորդների ներկայացուցիչներն այսօր հրավիրված մամլո ասուլիսի ժամանակ անդրադարձան դատավճռին՝ ամփոփ գնահատական տալով դատադատավարական ընթացքին:
Դատավարության ընթացքում բաց հարցեր մնացին կամ շրջանցվեցին: Ավետիսյանների իրավահաջորդի ներկայացուցիչ, փաստաբան Լուսինե Սահակյանն ասաց, որ հրապարակված դատական ակտից դժգոհ են: Նա վկայակոչեց այն հանգամանքը, որ ռուսական ռազմաբազայի զինվորների կողմից բազմաթիվ հանցագործություններ են կատարվել, որը նա պատահական չի համարում: Նրա դիտարկմամբ՝ Պերմյակովի դատավարության ընթացքում էլ հստակ երևաց, որ ՀՀ-ում գտնվող ռուսական ռազմաբազայի զինվորներն ընտրվում են անպատասխանատու կերպով: ՀՀ տեղափոխվում են այն զինվորները, որոնք խնդիրներ են ունենում ՌԴ-ում, այսինքն՝ իբրև աքսորավայր:
«Պերմյակովը ուներ առողջական լուրջ խնդիրներ և ՌԴ-ում նրան արգելվել էր զենք կրել, չգիտես ինչու ՀՀ-ում նրան զենք է տրամադրվել: Սա խնդիր է, որ պետք է լուծում ստանար: Մեր նպատակն էր, որ ՌԴ-ն նաև ֆինանսական պատասխանատվության ենթարկվելով հասկանար, որ ՀՀ-ի հետ նման կերպ չպետք է վարվի»:
Ըստ փաստաբանի, դատավորը եղել է զգուշավոր: Պատասխանատվության չեն ենթարկվել այն պաշտոնյանները, որոնք Պերմյակովին զորակոչել են բանակ և զենք տվել նրան ու պատշաճ կերպով հսկողություն չեն իրականացրել:
Ավետիսյանների իրավահաջորդի ներկայացուցիչ, Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը, համադրելով մի շարք հանգամանքներ, նշեց, որ դրանցից ելնելով եկել է եզրահանգման, որ Ավիտիսյանների ընտանիքի սպանության փաստով քննությունն իրականացվել է կոպիտ խախտումներով. ՀՀ քննչական մարմինը հնարավորություն չի ունեցել լիարժեք քննություն իրականացնել, ավելին՝ դա խոչընդոտվել է ՌԴ քննչական մարմնի կողմից՝ Ավետիսյանների ընտանիքի սպանության փաստով քրեական գործի հարուցմամբ:
«Ես գտնում եմ, որ Ավետիսյանների ընտանիքի սպանությունը որպես հանցագործություն ամբողջությամբ բացահայտված չէ: Միայն մեկ Պերմյակովով չեմ համարում, որ հանցագործությունը բացահայտված է՝ և վտանգը, որ ռուսական բազայից կարող են նման ոտնձգություններ լինել ՀՀ քաղաքացիների կյանքին, առողջությանը, անվտանգությանը, շարունակում է մնալ, որովհետև չկա պատշաճ, օբյեկտիվ և լրիվ քննություն»:
Իրավապաշտպանները գործի ամենալուրջ խնդիրը համարում են այն, որ պատասխանատվության չենթարկվեցին այն մարդիկ, որոնց վերահսկողության տակ էր Պերմյակովը:
Ավետիսյանների իրավահաջորդի ներկայացուցիչ, փաստաբան Արամազդ Կիվիրյանը նույնպես կարծում է, որ գործի հիմնական խնդիրն այն է, որ չեն բացահայտվել բոլոր այն մարդիկ, որոնց գործողությամբ և անգործությամբ տեղի է ունեցել նման հանցագործություն: Ռուսական կողմի մասով այս քննությունն այդպես էլ պատշաճ տեղի չունեցավ՝ շեշտեց փաստաբանը:
«Կային մարդիկ, ովքեր պատասխանատու էին այդ հարցում, թե, ի վերջո, ինչպես Պերմյակովը, ունենալով առողջական խնդիրներ. կա եզրակացություն, որ արգելված է վերջինիս զենք կրել, այնուամենայնիվ, նա ուղարկվում է ՀՀ, նրան զենք են տալիս, տեղի է ունենում դասալքություն, որի մասին ՀՀ-ին ուշ է տեղեկացվում: Այս մասով պետք է նույնպես առանձին քննություն լիներ»:
Արթուր Սաքունցն էլ տեղեկացրեց, որ ՌԴ ռազմաբազայի ղեկավարության պատասխանատվության հարցով իրենք արդեն Եվրոպական դատարան են դիմել՝ Ավետիսյանների իրավահաջորդի հետ:
Մանրամասները՝ տեսանյութում:
