Քիչ առաջ ՀՀ Ոստիկանության պետ Վլադիմիր Գասպարյանի հրամանով աշխատանքից ազատվել են Ոստիկանության Կոտայքի մարզային բաժնի պետ Սերոբ Հարությունյանը, Շիրակի մարզային բաժնի պետ Գրիշա Ամիրխանյանը, Արագածոտնի մարզային բաժնի պետ Գրիգոր Գրիգորյանը և Երևանի Քանաքեռ-Զեյթուն վարչական շրջանի ոստիկանության բաժնի պետ Ավետիք Աբրահամյանը։
«Առաջին լրատվական»-ի աղբյուրների փոխանցմամբ, երկուսն էլ աշխատանքից ազատվել են հանցաշխարհի հետ սերտ հարաբերությունների և առավելապես վերջին շրջանում նրանց մասնակցությամբ և ընկերակցությամբ կերուխումներին մասնակցելու համար։ Հայտնի է, որ մինչ Շիրակի մարզում նշանակվելը Գրիշա Ամիրխանյանը Կոտայքի մարզի վարչության պետն էր։
Սերոբ Հարությունյանն իր աշխատանքային կարիերան սկսել է ԱԱԾ-ում։ Եղել է ԱԱԾ գծով «Նուբարաշեն» ՔԿՀ պետի տեղակալը, որից հետո պաշտոնի է անցել ոստիկանական համակարգում: Ս. Հարությունյանը համարվում էր ԱԱԾ պետի տեղակալ Հրաչյա Հարությունյանի (Կրակեմ Հրաչ) մարդը։
Քիչ առաջ «Առաջին լրատվական»-ին հաջողվեց պարզել, որ աշխատանքից ազատված ոստիկանության գնդապետները մի քանի անգամ միասին մասնակցել են հանցագործ աշխարհի կազմակերպած խնջույքներին։ Զգուշացումները որևէ արդյունք չեն տվել։ Ոստիկանապետի հրամանները չեն ուշացել։
Թափուր պաշտոններում նոր նշանակումների մասին տեղեկություններ առայժմ չկան։