Ողջույն, ես Ֆրենկ Տուն եմ՝ Հայաստանում ԱՄՆ հյուպատոսը: Ամեն ամիս ես պատասխանում եմ ԱՄՆ մուտքի վիզաների ու ներգաղթի գործընթացներին վերաբերող ձեզ հետաքրքրող հարցերին: Շնորհակալ եմ ձեր ուղարկած բազմաթիվ հարցերի համար: Խնդրում եմ հարցն ուղարկելիս ներառել նաև ձեր էլեկտրոնային փոստի հասցեն, որպեսզի մեր թողարկումներում ձեր հարցին անդրադառնալու հնարավորություն չունենալու դեպքում ձեզ գրավոր պատասխան տանք: Այս թողարկման ընթացքում կխոսեմ ԱՄՆ կառավարության առաջնահերթություններից մեկի՝ կրթական վիզաների մասին:
Միացյալ Նահանգները սատարում է միջազգային կրթությանը և ողջունում միջազգային ուսանողներին և փոխանակման ծրագրերի այցելուներին: Միացյալ Նահանգներում ուսանելու համար անհրաժեշտ է ուսանողական վիզա: Ուսանողները, ներառյալ հայերը, Միացյալ Նահանգներում չեն կարող ուսանել տուրիստական/բիզնես-վիզաներով՝ բացառությամբ ժամանցային ուղղվածության ուսուցումների՝ տուրիստական վիզայի շրջանակում: Միացյալ Նահանգներում ուսանելու համար ուսանողներին անհրաժեշտ է ուսանողական վիզա (F-1 կամ M-1):
Աստիճան կամ հավաստագիր շնորհող կրթական ծրագրերին մասնակցությունը բիզնես/տուրիստական վիզայով արգելվում է, նույնիսկ եթե ծրագիրը կարճաժամկետ է: Օրինակ՝ հեռակա ուսուցումը, որը պահանջում է որոշակի ժամանակի անցկացում համալսարանական ավանում, պահանջում է F-1 տեսակի վիզա:
Ինչպիսի՞ն է կրթական վիզայի գործընթացը:
Նախքան F կամ M տեսակի վիզա ստանալու համար ԱՄՆ դեսպանատանը կամ հյուպատոսությանը դիմելը՝ ուսանողը պետք է ընդունվի համալսարան, որը ԱՄՆ Քաղաքացիության և ներգաղթի ծառայության ուսանողների և փոխանակման այցելուների ծրագրերի կողմից հաստատված բուհերի ցանկում է:
Երբ ԱՄՆ կրթական հաստատությունը ձեզ հաստատի որպես իր ուսանող, դուք ինքնաբերաբար կընդգրկվեք ուսանողների և փոխանակման ծրագրերի այցելուների տեղեկատվական համակարգում (SEVIS): Ձեզանից կպահանջվի վճարել SEVIS I-901 միջնորդավճարը: Համալսարանը ձեզ կտրամադրի I-20 ձևը, որը դուք վիզայի հարցազրույցի օրը կներկայացնեք հյուպատոսական պաշտոնյային: Եթե ձեր ամուսինը և/կամ երեխաները Միացյալ Նահանգներում ձեր ուսման ընթացքում ծրագրում են բնակվել ձեզ հետ, նրանք նույնպես պետք է ստանան I-20 ձևը, սակայն նրանցից չի պահանջվի վճարել SEVIS I-901 միջնորդավճարը:
Գործընթացի մնացյալ մասը նման է բիզնես/տուրիստական վիզայի ընթացակարգին, որի մանրամասներին կարող եք ծանոթանալ մեր կայքում՝ Armenia.usembassy.gov:
Անհրաժեշտ կլինի լուսանկարվել, լրացնել առցանց դիմումը, վճարել դիմումի միջնորդավճարն ու հարցազրույցի պայմանավորվածություն ձեռք բերել՝բացելով հաշիվ www.usvisa-info.com էջում:
Ո՞րն է կրթական վիզային դիմելու լավագույն ժամանակը:
Վերջին տարիներին մեզ համար ամենածանրաբեռնված շրջանը դիմումների առատության առումով եղել են ապրիլ և մայիս ամիսները: Ծանրաբեռնվածությունը մասամբ պայմանավորված է կրթական վիզաներով:
Նոր ընդունված ուսանողների համար ուսումնական տարին հիմնականում սկսվում է օգոստոսին կամ սեպտեմբերին, իսկ F-1 կամ M-1 կրթական վիզան կարող է տրամադրվել դասերի մեկնարկի օրվանից (օրը նշվում է I-20 կամ DS-2019 ձևերում) առավելագույնը 120 օր առաջ: Խնդրում ենք նկատել, որ սկսնակ ուսանողներին թույլատրվում է մուտք գործել Միացյալ Նահանգներ դասերի մեկնարկից առավելագույնը 30 օր առաջ:
Իրենց ուսանողի կարգավիճակը, ինչպես նաև SEVIS տվյալները պահպանած և կրթությունը շարունակող ուսանողները կարող են թարմացնել իրենց վիզան ցանկացած ժամանակ: Նրանք Միացյալ Նահանգներ կարող են մուտք գործել ցանկացած պահի՝ անկախ դասերի մեկնարկի օրվանից:
Չնայած աճող ծանրաբեռնվածությանը՝ իմ գրասենյակն անում է հնարավորը՝ թույլ չտալու համար, որ ուսանողների՝ հարցազրույցին սպասելու ժամկետը գերազանցի երեք աշխատանքային օրը: Սակայն լինում են գործեր, որոնք պահանջում են հավելյալ քննություն, ինչն էլ իր հերթին պահանջում է հավելյալ ժամանակ: Երբեմն էլ համակարգին առնչվող խնդիրներ են ի հայտ գալիս, ինչի հետ բախվեցինք անցյալ տարի, որոնք ազդում են բոլոր գործերի ընթացքի վրա: Անկանխատեսելի իրավիճակներից խուսափելու համար խորհուրդ ենք տալիս վիզայի համար դիմել I-20 կամ DS-2019 ձևերը ստանալուց անմիջապես հետո:
Ինչի՞ն է ուշադրություն դարձնում հյուպատոսական պաշտոնյան հարցազրույցի ընթացքում:
Հարցազրույցի ընթացքում հյուպատոսական պաշտոնյան որոշում է, թե արդյոք դիմողը որակավորվա՞ծ է վիզա ստանալու համար և, ճամփորդության նպատակից ելնելով, որոշում է վիզայի տեսակը: Դուք պետք է ապացուցեք, որ բավարարում եք վիզայի տվյալ տեսակը ստանալու ԱՄՆ օրենքով սահմանված չափանիշներին: Ուսանողական վիզայի համար դիմողը պետք է՝
– փարատի ներգաղթելու վերաբերյալ կասկածները՝ ցույց տալով իր կապերը Հայաստանի հետ,
– ապացուցի, որ լավ ուսանող է,
– ցույց տա, որ ունի բավականաչափ ֆինանսական միջոցներ ուսման առաջին տարվա և հետագա կրթության համար:
Հայաստանի հետ կապերի մասով հյուպատոսական պաշտոնյան գիտակցում է, որ ուսանողները հիմնականում երիտասարդ են և դեռևս չունեն այնքան ամուր կապեր, որքան իրենց ծնողները: Նրանք կարող են հարցեր ուղղել դիմողի հետագա ծրագրերի վերաբերյալ՝ հասկանալու համար, թե նրա հետագա ծրագրերը որքանով են արժանահավատ և որքանով կարող են դիտարկվել որպես Հայաստանի հետ կապ:
Լավ ուսանող լինելու մասով հյուպատոսական պաշտոնյան հարցնում է նախկինում ստացված կրթության և կրթական նպատակների մասին: Ուսանողը պետք է պատրաստ լինի քննարկել այս թեմաները և չմոռանա իր հետ բերել կրթական փաստաթղթերը՝ առաջադիմության թերթիկը, դիպլոմները:
Եվ վերջում՝ ֆինանսական ապահովվածության մասին: Բանկային տեղեկանքը կարող է օգտակար լինել, բայց հյուպատոսական պաշտոնյան հիմնվելու է հարցազրույցի ժամանակ հնչեցված ձեր պատասխանների վրա: Ուսանողը պետք է պատրաստ լինի պատասխանել իր, ծնողների աշխատանքի, ունեցվածքի, եկամտի վերաբերյալ հարցերին:
Ո՞վ կարող է ինձ խորհուրդ տրամադրել:
Հայաստանում գործում է մի հիասքանչ կառույց՝ «Ամերիկյան խորհուրդներ» անվանմամբ, որի աշխատակիցները հիմնականում ԱՄՆ-ում ուսանած հայեր են:
Որպես ԱՄՆ պետքարտուղարության կողմից ֆինանսավորվող կազմակերպություն՝ «Ամերիկյան խորհուրդները» ուսանողներին տրամադրում է ԱՄՆ քոլեջներ և համալսարաններ դիմելու մասին ճշգրիտ, համապարփակ և թարմ տեղեկատվություն: Տրամադրվող բոլոր ծառայությունները՝ թեստի նախապատրաստվելու համար գրադարանի գրքերից օգտվելուց մինչև անհատական խորհրդատվություն, դասախոսություններից, գործնական հանդիպումներից մինչև թեստավորում, խմբային խորհրդատվություն և մարզերում տեղեկատվական արշավների ապահովում, կազմակերպվում են անվճար հիմունքներով: «Ամերիկյան խորհուրդների» գրասենյակը «Իմպերիա Պլազա» բիզնես-կենտրոնում է, որի հասցեն է Ամիրյան փողոց 4/7, 0010, Երևան, ՀՀ: Նրանց հեռախոսահամարն է՝ (374 10) 54-40-12, կայքի հասցեն՝ americancouncils.am: Կենտրոնի աշխատանքային ժամերն են՝ 10:00-18:00, երկուշաբթի-ուրբաթ: Նրանք սպասարկում են բոլորին՝ ներառյալ ԱՄՆ պոտենցիալ ուսանողների ծնողներին՝ անկախ վերջիններիս տարիքից և կրթությունից:
Ինչպես միշտ, շնորհակալ եմ ձեր հարցերի համար: Հուսով եմ, որ դրանց միջոցով մեր գործընթացները և օրենքները ավելի ընկալելի և թափանցիկ կդառնան: Սիրով կպատասխանեմ ձեր մյուս հարցերին մեր հետագա թողարկումներում:
