Գործատուն իրավունք ունի կարդալ աշխատանքային ժամերին հաղորդագրությունների փոխանակման ծառայության և էլեկտրոնային փոստի միջոցով ուղարկված աշխատակիցների անձնական հաղորդագրությունները: Այսպես է վճռել Մարդու իրավունքների եվրոպական դատարանը, հաղորդում է BBC-ն:
Ստրասբուրգի դատարանը քննել է Ռումինիայից ինժեների ներկայացրած հայցը` ուղղված այն ընկերությանը, որտեղ նախկինում աշխատել է: Ընկերության ղեկավարությունը նրան ախատանքից հեռացրել է 2007-ին` վերջինիս նամակագրության հետ ծանոթանալուց հետո:
Հայցորդը պահանջել է գործատուի գործողությունները ճանաչել իր` անհատական նամակագրության գաղտնիության իրավունքի խախտում:
Դատավորները մերժել են հայցը: Նրանք եզրակացրել են, որ աշխատողը խախտել է ընկերության օրենքները, և գործատուն ստուգելու իրավունք ուներ` ինչպես է նա կատարում իր աշխատանքը:
