Հունվարի 2-ին Երևանի «Արմենիա» բժշկական կենտրոնում հղիության 26-րդ շաբաթում մահացած 20-ամյա Գրետա Տոնոյանին այսօր կհուղարկավորեն Այղր լիճ համայնքում՝ նրա հայրական տան գերեզմանոցում:
Արագածոտնի մարզի Գայ գյուղում, որտեղ ամուսնու հետ ապրում էր երիտասարդ Գրետան, երեկ տեղի է ունեցել մահացած հղի կնոջ հոգեհանգիստը: Գայ համայնքի ղեկավարի տեղակալ Խուրշուդ Քոչարյանը մեզ հետ զրույցում ասաց, որ լուրն իմանալով՝ գյուղում ամանորյա տոնական տրամադրությունը փոխվել է տխրության: «Ժողովուրդը տխրած է, տրամադրությունն էն չի: 20 տարեկան հղի աղջիկ… Բոլորն էլ տխրեցին, որ իմացան, նեղված, ճնշված են»,- ասաց Քոչարյանը:
Գրետայի ամուսինը՝ Սուրեն Նավասարդյանը, Հովտաշատ գյուղում պատմության ուսուցիչ է: «Շատ հարգված ընտանիք են գյուղում»,- ասաց գյուղապետի տեղակալը:
Նրա խոսքով՝ գյուղում հղիների հսկողությունը իրականացվում է կա՛մ Էջմիածնի, կա՛մ Երևանի հիվանդանոցներում, գյուղում նման մասնագետ ու հնարավորություն չկա:
Թե իրականում ինչ է կատարվել, ով է մեղավոր և ով պետք է պատասխան տա 20-ամյա հղի կնոջ մահվան համար՝ գյուղում դեռ քննարկում են, հստակ տեղեկություն չունեն:
Նշենք, որ մահացած երիտասարդ Գրետայի հարազատները նրա մահվան պատճառ են համարում բժիշկների անփույթ վերաբերմունքը: Հարազատները մամուլում ասել են, որ Գրետան Հանրապետական ծննդատուն է տեղափոխվել դեկտեմբերի 25-ին, որտեղ նրա մոտ ախտորոշել են գրիպոզ վիճակ, և միայն մի քանի օր անց, երբ վիճակը սրվել է, թոքերը ռենտգեն են արել ու հայտնաբերել սուր թոքաբորբ: Ըստ հարազատների՝ Գրետան հունվարի 2-ին մահացել է ուշացած բուժօգնության հետևանքով:
