ԴԱԻՇ-ի զինյալների շարքերը համալրած Գերմանիայի քաղաքացիների 10 տոկոսը կազմում են թույլ սեռի ներկայացուցիչները, իսկ Ֆրանսիայի քաղաքացիների շարքում ցուցանիշը կազմում է 25 տոկոս՝ գրում է Der Spiegel-ը:
Եվրոպայից Մերձավոր Արևելք մարտնչելու նպատակով ուղևորված տղամարդկանց ու կանանց հստակ թիվը հայտնի չէ: Սոցիոլոգներն ու հոգեբանները փորձել են պարզել, թե ինչ շարժառիթներ են նրանց ստիպում դիմել նման վտանգավոր քայլի: Պատերազմ գնացած ոչ բոլոր եվրոպացի կանայք են արմատականների կանայք: Շատերը նման որոշում են կայացնում ինքնուրույն՝ գրում է թերթը:
Գիտնականները եկել են այն եզրակացության, որ կանանց շարժառիթները տարբերվում են տղամարդկանց շարժառիթներից:
Բարոյական չափորոշիչների պարզությունը գրավում է դեռահասներին, ովքեր հիասթափված են Արևմուտքում իրենց հասակակիցներից:
Շատերը Մերձավոր Արևելք են գնում՝ այնտեղ գտնելու «առաքինի ամուսին»: Ոչ հազվադեպ էլ պատճառ է դառնում ընդվզումը ծնողների դեմ:
Շատ աղջիկներ իրենց Արևմուտքում տանը չեն զգում: Եվրոպական շատ երկրներ ընդունել են օրենքներ, որոնք սահմանափակում են ավանդական մուսուլմանական հագուստի կրումը: Իսկ ահա Արևելքում նրանք իրենց զգում են հարազատ միջավայրում:
Եվ վերջապես՝ գաղափարախոսություն. շատ երիտասարդ տղամարդիկ և կանայք Սիրիա են ուղևորվում՝ օգնելու մարդկանց: Նրանք այնտեղ հիասթափվում են, երբ համոզվում են, որ ստիպված են ոչ միայն լավերին վատերից պաշտպանել, այլև սպանել անմեղներին:
Սիրիա գնացած կանանց համար վերադարձի ուղին շատ ավելի դժվարին է, քան տղամարդկանց: ԴԱԻՇ-ի վերահսկվող գոտիներից նրանք չեն կարող դուրս գալ առանց խնամակալ տղամարդու՝ գրում է Der Spiegel-ը: