«Հայաստանն առաջիկայում ավելի հեռահար զինատեսակներով է համալրելու իր զինանոցը: Մենք օրըստօրե ՌԴ-ի և այլ երկրների հետ ընդլայնում ենք մեր ռազմատեխնիկական համագործակցությունը, որպեսզի նոր տեսակի սպառազինություն ձեռք բերենք և համալրենք եղածը»,- այսօր Տնտեսագիտական համալսարանում ուսանողների հետ հանդիպման ժամանակ ասաց պաշտպանության նախարար Սեյրան Օհանյանը՝ հավելելով, որ զենքի ձեռք բերման մասին այլ տեղեկություն չի կարող ասել, քանի որ դա ռազմական գաղտնիք է պարունակում:
Նախարարը խոսեց նաև Դիլիջանում տեղի ունեցած վերջին՝ Սամվել Հարությունյանի հետ կապված դեպքին: «Անկասկած, յուրաքանչյուր այսպիսի դեպք մտահոգում է բանակին: Ես ցուցումներ տվեցի, որ այն թերությունները, որոնք որ հայտնաբերվել են զորամասում, վերացնեն: Եվ վստահեցնում եմ, որ կպատժվեն այն մարդիկ, ովքեր պատասխանատվություն են կրում այդ ամենի համար»:
Պատասխանելով «Առաջին լրատվական»-ի հարցին՝ ինչո՞վ է պայմանավորված այն փաստը, որ նախորդ երկու ամիսներին, երբ հակառակորդն աննախադեպ ակտիվություն էր ցուցաբերում, մենք բանակում կանոնադրական կամ միջանձնային հարաբերությունների խախտման արդյունքում սպանության ոչ մի դեպք չունեցանք, սակայն հակառակորդի լռելուն պես՝ երկու դեպքեր հաջորդեցին մեկը մյուսին, նախարարը նկատեց. «Ես գտնում եմ, որ այն իրականության մեջ, երբ պետք է ընդհանուր պայքար մղել հակառակորդի դեմ, բոլորը համախմբվում են այդ խնդրի շուրջ: Եվ հետո՝ արտակարգ պատահարներ տեղի չեն ունենում այն զորամասերում, որտեղ արդյունավետ և լարված մարտական պատրաստություն, ուսումնական գործընթաց է կազմակերպվում: Դեպքեր տեղի են ունենում այն զորամասերում, որտեղ անձնակազմը ազատ է, թողտվության մեջ: Իրենք ազատ վիճակում սկսում են մտածել այս կամ այն բանի մասին»,- ասաց Սեյրան Օհանյանը:
Մեր դիտարկմանը, թե՝ կարո՞ղ ենք ասվածից հետևություն անել, որ նախորդ մնացած դեպքերում, երբ զինծառայողներ են զոհվում բանակում ոչ հակառակորդի կողմից, ամենաթողության և պարապության արդյունք են, նախարարը նկատեց. «Այո, այնտեղ, որտեղ դեպքեր են տեղի ունենում, պատճառներից մեկը պարապ մնալն է»:
Սեյրան Օհանյանն անդրադարձավ նաև հայ ռազմագերի Հակոբ Ինջիղուլյանի տեղափոխմանը: Նախարարի խոսքով՝ Հակոբն այս օրերին գտնվում է միջանկյալ տարածքում, որտեղ կորոշի՝ գնալ երրորդ երկի՞ր, թե՞ տեղափոխվել Հայաստան: «Սակայն, մեր տեղեկություններով, Հակոբ Ինջիղուլյանը ցանկանում է վերադառնալ հայրենիք»,- ասաց Սեյրան Օհանյանը:
