Գյումրու վաճառակետերում և կենտրոնական շուկայում վերջին օրերին նկատվել է որոշ ապրանքատեսակների գների աճ: Մասնավորապես վերջին երկու- երեք օրերին շուրջ 20 տոկոսով թանկացել է հացը:
Հացի արտադրությամբ զբաղվող գործարարներից մեկը, որը չցանկացավ ներկայանալ, մեզ հետ զրույցում նշեց, որ հացի թանկացումը պայմանավորված է ալյուրի գնի բարձրացման հետ:
Մոտավորապես 15-20 տոկոսով ալյուրի գինը բարձրացել է: Գնային բարձրացումները գյումրեցի սպառողները համարում են անտրամաբանական՝ նշելով, որ որոշ անհատներ իրենց հաշվին ցանկանում են հարստանալ:
«Հերիք չէ՞ էս խեղճ ժողովրդին տանջեն, ի՞նչ գուզեն, գենոցիդ կենեն»,- այսպես արտահայտվեց գյումրեցի սպառող Գագիկ Կարապետյանը:
Հացի թանկացմանը զուգահեռ Գյումրու որոշ խանութներում նկատվում է նաև մակարոնեղենի գնի բարձրացում: Նշենք, որ օրեր առաջ 110 դրամանոց հացը, այսօր արդեն վաճառակետերում սպառողները ձեռք էին բերում 140 դրամով: Թե ինչով է պայմանավորված հանրապետության ամենաաղքատ մարզում հացի գնի կտրուկ բարձրացումը, պաշտոնական բացատրություն դեռևս չկա:
Փայլակ Ֆահրադյան
«Առաջին լրատվական»-ի Շիրակի մարզային թղթակից
