«Աժ ՀՀԿ խմբակցության պատգամավոր Նահապետ Գևորգյանի որդին՝ Արտակ Գևորգյանը, օրերս ձերբակալվել էր զենքի սպառնալիքով ավտոմեքենա առևանգելու համար: Մինչ այդ էլ Գևորգյանի անունը շրջանառվում էր 2008թ. Արմավիրի մարզի Նալբանդյան գյուղի համայնքապետ Ռոլանդ Մկրտչյանի սպանության, Աժ ԲՀԿ-ական պատգամավոր Ռուստամ Գասպարյանի դեմ մահափորձի և այս տարվա մայիսին կայացած Աժ ընտրությունների ժամանակ թիվ 21 ընտրատարածքում առաջադրված պատգամավորության թեկնածու Մերուժան Մխոյանին առևանգելու և ծեծի ենթարկելու աղմկահարույց դեպքերի ժամանակ»,- գրում է «Ժողովուրդ»-ը և հավելում.
«Ու չնայած նրա հանցագործ կերպարին՝ Արտակ Գևորգյանն աշխատում էր ՀՀ նախագահի վերահսկողական ծառայությունում: Շարունակո՞ւմ է նա լինել ՀՀ նախագահի նստավայրի աշխատակից: «ժողովուրդ»-ի այս հարցին նախագահականի հասարակայության հետ կապերի և տեղեկատվության բաժնի պետ Մերի Հարությունյանը պատասխանեց. «Աժ ՀՀԿ-ական պատգամավոր Նահապետ Գևորգյանի որդին՝ Արտակ Գևորգյանը, չի աշխատում ՀՀ նախագահի աշխատակազմում: Ա. Գևորգյանը ՀՀ նախագահի աշխատակազմի վերահսկողական ծառայությունում աշխատել է ծառայությունների մատուցման պայմանագրով՝ 19.06.2009-14.01.2010 թթ. ժամանակահատվածում որպես իրավաբան:
Կանոնադրական գործառույթներից բխող մասնագիտական ծառայությունների մատուցման աշխատանքների ավարտից հետո, պայմանագրի համաձայն, նրա աշխատանքը ՀՀ նախագահի աշխատակազմում դադարեցվել է»:
Իսկ թե ինչ գիտեն այդ տղայի մասին նախագահականում, իրեն ինչպես է դրսևորել, արդյոք նախկինո՞ւմ էլ են նման դեպքեր եղել, որոնց մասին հասարակությունը չի իմացել, չկարողացանք պարզել, քանի որ այս հարցերը՝ ուղղված նախագահականի հասարակայնության հետ կապերի և տեղեկատվության բաժնին, մնացին անպատասխան»:
