Ղրղզստանի իշխանությունները սկսել են փոխել քաղաքների ու գյուղերի ռուսական անվանումները: Այն, որ անվանումները պետք է փոխել, իր եզրակացության մեջ նշել է Ղրղզստանի նախագահին կից Լեզվի պետական կոմիտեն: Անվանափոխության են ենթակա նաև ուզբեկական անվանումները:
Եզրակացության մեջ նշվում է, որ «ուզբեկներն ու թուրքմեններն արդեն վաղուց կարգի են բերել իրենց քարտեզները` փոխելով քաղաքների, գյուղերի, այիլների անվանումները, մինչդեռ Ղրղզստանն այս հարցում բավականին հետ է ընկել»: Որպես օրինակ է բերվել Չույսկի շրջանը, որի կազմում է մայրաքաղաք Բիշքեքը: Ըստ կոմիտեի եզրակացության՝ միայն այդ շրջանում ավելի քան 150 աշխարհագրական անվանում ղրղզական չեն կամ աղավաղված են:
«Վաղուց ժամանակն է, որպեսզի ազատվենք «սրբազան «ովկա» և «ևկա» վերջավորություններից (Ալեքսեևկա, Մալինովկա, Լեբեդինովկա և այլն): Պարզ չէ, թե ինչ սխրանքներ են գործել Մանասի հողի եկվորները, ինչ հանճարեղ գործերի համար են վաստակել ընդմիշտ իրենց անվանումները թողելու պատիվը»,- ասված է կոմիտեի եզրակացության մեջ:
Սակայն եզրակացության հրապարակումը մեծ սկանդալի առիթ է դարձել: Բուռն քննարկումներ են սկսվել, քանի որ Ռուսաստանի հետ հարաբերություններն առանց այդ էլ բարդացած են, բացի այդ՝ եզրակացությունը հրապարակվել էր իշխող կուսակցություններից մեկի պաշտոնանթերթում: Ռուսական տեսակետի կողմնակիցները նշում էին, որ ռուսական անվանումներ ունեն հիմնականում այն բնակավայրերը, որոնք հիմնադրվել են ռուսների կողմից, և այդ շրջանները ղրղզների կողմից բնակեցված չեն եղել: Այս հրապարակումը հայտնվել էր մամուլում անցած հինգշաբթի։ Արդեն ուրբաթ օրը Ղրղզստանի նախագահ Ռոզա Օթումբաևան աշխատանքից ազատեց կոմիտեի նախագահին:
Независимая газета-ն նշում է, որ վերջին ամիսներին սա առաջին հակառուսական և հայրենասիրական քայլը չի եղել: Օրինակ՝ մի քանի ամիս առաջ նախագահի խորհրդական Թոփչուբեկ Թուրգունալիևը հայտարարել էր, որ բոլոր նրանք, ովքեր չգիտեն մայրենին, «ոչ լիարժեք են և պետական պաշտոններ զբաղեցնելու ոչ արժանի», իսկ խորհրդարանում պարսավանքի են ենթարկում նրանց, ովքեր ռուսերեն են խոսում:
Ռուսական փորձագետներն այս շարժումը կապում են իբր թե երկրում տնտեսական վիճակի վատթարացման հետ, երբ իշխանությունները, չկարողանալով լուծել իրենց խնդիրները, փորձում են դրանց համար տարբեր պատճառաբանություններ գտնել և շեղել հասարակության ուշադրությունը:
