Վաղը Հայաստանի հանրապետության քաղաքացիները գնալու են ընտրության և ձևավորելու են նոր խորհրդարան, երկրի օրենսդիր նոր մարմին: Յուրաքանչյուր քաղաքացի ընտրելու է ըստ իր պատկերացումների, չափանիշների, գիտակցության, ըստ իր պահանջների: Բայց մի բան պարզ է՝ մտնելով քվեախցիկ, քաղաքացին, թերևս, պետք է գիտակցի, որ այդ պահին ինքը երկրի նախագահ է: Յուրաքանչյուր քաղաքացի քվեախցիկում պետք է գործի որպես Հայաստանի Հանրապետության նախագահ՝ ինչ կաներ, ինչը կընտրեր, ինչով կառաջնորդվեր նա որպես նախագահ:
Գաղտնիք չէ, որ մեր քաղաքացիներից յուրաքանչյուրն իրեն համարում է այս կամ այն հարցի մեծ գիտակ, այս կամ այն ոլորտի մասնագետ, մեծ տնտեսագետ, քաղաքական գործիչ, ամեն մարդ համարում է, որ ի տարբերություն իշխանության` ինքը կարող էր շատ արագ փոխել երկիրը, հանել երկիրը ծանր վիճակից: Եվ ահա համապետական ընտրության ժամանակ քաղաքացուն տրվում է այդ հնարավորությունը, և ամեն մարդ, մտնելով քվեախցիկ, իրեն այդ պահին պետք է զգա որպես երկրի նախագահ, որպես մարդ, որի ձեռքում է այդ պահին երկրի կառավարումը և ինչ որոշում և ինչ ընտրություն որ ինքը կայացնի, այդպես էլ ապրելու է երկիրը առաջիկա տարիներին, այդպես էլ ապրելու են զավակները, հարազատները, բարեկամները, ընկերները, ինքը:
Վաղը Հայաստանի քաղաքացիները ստանում են երկիրը կառավարելու իրավունք, և քվեախցիկում նրանցից յուրաքանչյուրը դառնում է երկրի միանձնյա կառավարիչ՝ եթե կուզեք՝ նաև բռնապետ, ու իր ձեռքով վճռում երկրի բախտը:
Պատասխանատվության այդ գիտակցումով պետք է մարդը մտնի վաղը ընտրատարածք, քվեախցիկ ու կայացնի իր որոշումը: Թե ինչ է լինում այդ որոշումից հետո, կեղծում են, չեն կեղծում, պահպանվում է ձայնը, չի պահպանվում` դա արդեն բոլորովին այլ հարց է, այլ պրոցես: Իսկ մինչ այդ, վաղն առավոտյան` ժամը 20-ից յուրաքանչյուրիս տրված է մի քանի րոպեով երկրի միանձնյա ղեկավար լինելու հնարավորություն, ու երկրի ապագան, մեր բոլորիս ապագան, դրա որակը, նոր Հայաստանի ճակատագիրը կախված է նրանցից, թե վաղը՝ մայիսի 6-ին, մեզանից յուրաքանչյուրը ինչպես կիրականացնի երկրի ղեկավարի իր պարտականությունը, ինչ արժեքներ կընտրի, ինչպիսի երկրի, ինչպիսի ապագայի կտա նախապատվությունը: Ազատությունն ու բարին բոլորի հոգում ու մտքին, և կեցցե՛ այն Հայաստանը, որ լինելու է այդ ազատության և բարու, այդ ազատ բարության և բարի ազատության ծնունդը:
