ՀԱԿ համամասնական ցուցակում ընդգրկված Վահան Վարդապետյանն այսօր Ազատության հրապարակում հայտարարեց, թե իշխող վարչախմբի մոտ միշտ և ամեն ինչ չի ստացվում, և Հանրապետականի յուրաքանչյուր կարգախոսի հակառակն է իրականանում. «Ասում էին «Առա՛ջ Հայաստան», բայց հասարակությունը ստացավ դատարկվող, կործանված Հայաստան: Ասում էին ռոմանտիկ կարգախոս` «Ես սիրում եմ քեզ», բայց խաբելով գնդակահարելով սպանում են մեզ: Խաբելով, գնդակահարելով չեն սիրում: Այդպես ոչ թե սիրում են, այլ ատում են»: Նաև հավելեց. «Հայտարարում էին, թե Ազգային ժողովում օլիգարխներ չեն լինելու, սակայն տնետուն ընկած ձայներ են խնդրում»: «Չհավատաք, որովհետև դեպի լավը չի փոխվելու: Ո՛չ մի ակնկալիք իշխող վարչախմբից, և վե՛րջ»,- նշեց նա:
Ելույթ ունեցավ նաև Ստեփան Դեմիրճյանը, ով նշեց, որ վարչախմբի ապաշնորհ կառավարման հետևանքով երկիրը «հայտնվել է արտագաղթի, գործազրկության մեջ»: Ըստ նրա՝ ստեղծված վիճակի համար պատասխանատու են կոալիցիայի մեջ հայտնված բոլոր քաղաքական ուժերը` Հանրապետականի գլխավորությամբ: «Արդյունքում ունենալու ենք ավելի մեծ արտագաղթ, խորը բարոյական անկում: Այս ամենը մենք չենք կարող հանդուրժել, եթե մենք մտածում ենք մեր երեխաների ապագայի մասին, պետք է փոխենք այդ վիճակը: ՀԱԿ-ը ունի համապատասխան ներուժ` երկիրն այդ վիճակից դուրս բերելու համար»,- ասաց նա:
