Աֆղանստանի նախագահ Համիդ Քարզայը կոալիցիոն զորքերին կոչ է արել արագացնել իշխանության հանձնումը տեղի անվտանգության ուժերին: Այս մասին հաղորդում է Agence France-Presse-ը:
Քարզայի պահանջը կապված է օրերս բարձրացած աղմուկի հետ, երբ The Los Angeles Times-ը հրապարակեց «Թալիբանի» սպանված ահաբեկիչների մարմինների մասերի հետ ամերիկացի զինծառայողների լուսանկարները։
«Նման ցավոտ փորձություններին վերջ տալու միակ ելքը որքան հնարավոր է շուտ և ամբողջ ծավալով լիազորությունները փոխանցելն է աֆղանական կառույցներին»,- հայտարարել է նախագահը:
Ներկայիս աղմուկը տարվա սկզբից արդեն չորրորդն է՝ կապված Աֆղանստանում ամերիկյան զինծառայողների գործողությունների հետ: Այսպես, հունվարին տեսագրություն էր տարածվել, որտեղ ամերիկացի զինվորականները միզում էին մահացած թալիբների մարմինների վրա: Փետրվարին ամերիկացի զինվորները բախում հրահրեցին տեղի բնակիչների հետ՝ Ղուրանն այրելու պատճառով: Եվ վերջապես, մարտին մի ամերիկացի զինվորական սպանել էր 16 աֆղանցիների:
