Ինչպես այսօր գրում է ռուսական «Կոմերսանտ» օրաթերթը, Ռուսաստանի Անվտանգության դաշնային ծառայությունը որոշում է կայացրել հեռակա կարգով մեղադրանքներ առաջադրել չեչեն գրոհայինների առաջնորդ Դոկու Ումարովին` վարչապետ Վլադիմիր Պուտինի դեմ մահափորձ կազմակերպելու համար:
Հիշեցնենք, որ այս տարվա փետրվարին հայտնի էր դարձել, որ Ուկրաինայի Օդեսա քաղաքի բնակարաններից մեկում տեղի ունեցած պայթյունի հետևանքով զոհվել է մեկ մարդ, ևս մեկը` վիրավորվել:
Հետագայում պարզվել է, որ այդ տանն ապրող մարդիկ մահափորձ են նախապատրաստել Վլադիմիր Պուտինի դեմ: Տարօրինակ կերպով մահափորձի մասին տեղեկությունը մի քանի շաբաթ գաղտնի էր պահվում և բացահայտվեց ռուսական «Առաջին ալիք»-ի կողմից Ռուսաստանի նախագահական ընտրություններից մի քանի օր առաջ:
Այս հանգամանքը լուրջ կասկածներ առաջացրեց փորձագետների մոտ, որոնք նշեցին, որ այս գործողությունները կարող են հանդիսանալ նախընտրական քարոզչության մի մաս:
Ներկայումս Ռուսաստանի իշխանությունները նախապատրաստում են համապատասխան փաստաթղթեր` ողջ մնացած Օսմաևի արտահանձնումը կազմակերպելու և նրան Ռուսաստանի օրենքներով դատելու համար:
