ԱԺ պատգամավորության թեկնածու Կարեն Սարիբեկյանը, անտեսելով ընտրարշավը, օրն սկսեց Վանաձորի բարձրադիր, ծայրամասային Բազում թաղամասում ծառատունկով:
Ծառատնկման աշխատանքներին մասնակցեցին թաղամասի թիվ 25 հիմնական դպրոցի և թիվ 19 մանկապարտեզի սաները, ինչն իր նպատակն ունի` մատաղ սերնդին կապել բնության հետ: Սաների ձեռքով տնկած տնկիները պայմանականորեն անվանվեցին սաների անուններով, իսկ նրանք խոստացան ավելի հետևողական լինել և խնամել նույնիսկ իրենց ընկերների տնկիները. «Յուրաքանչյուր երեխա մոտ պիտի լինի բնությանը, դրա համար նախ պետք է ծառ տնկել, հետո հետևել ու բնության հանդեպ սեր սերմանել»:
Վանաձոր քաղաքի մյուս ծայրամասում համաքաղաքային միամսյակի առաջին օրը իր աշխատակազմով քաղաքը մաքրում էր ՀՀԿ համամասնական ցուցակով ընտրություններին մասնակցող Վանաձորի քաղաքապետ Սամվել Դարբինյանը, որը միացավ Կարեն Սարիբեկյանին և մասնակցեց ծառատունկին:
Աշխատակազմի քարտուղար Գագիկ Սիմոնյանը նկատեց. «Քաղաքը մաքուր պահելու ձևը չկեղտոտելն է, սակայն քաղաքացիները աղբը պատշգամբից էլ են դուրս նետում»։
Քաղաքապետարանը որոշել է մրցանակներ շնորհել լավագույն մասնակցություն ունեցած շենքերին` բակերը բարեկարգելով:
Հետաքրքիր է, որ քաղաքապետարանում դա ընտրակաշառք չեն համարում. «Ընտրությունները կանցնեն կգնան, բայց բարետես բակերն ու ծառերը մեր քաղաքին շուք կտան»,- համոզված են քաղաքապետարանում:
