Լեռնային Ղարաբաղի «Եղնիկներ» զորամասում փետրվարի 29-ի առավոտյան արձանագրված 19-ամյա զինծառայողի մահվան գործով նոր ձերբակալվածներ կան:
Թեև Տիգրան Վարյանի դիահերձմանը մասնակցած Հելսինկյան ասոցիացիայի փորձագետ Ռուբեն Մարտիրոսյանը պնդում էր, որ զինծառայողին սպանել են, և տղայի մահվան առիթով Քրեական օրենսգրքի 110 հոդվածի 1-ին մասով գործ հարուցելը (ինքնասպանության հասցնելը) պետք է վերաորակել որպես դիտավորյալ սպանություն, ՀՀ ՊՆ քննչական ծառայության 3-րդ կայազորային քննչական վարչությունում քրեական գործ հարուցվեց ՀՀ Քրեական օրենսգրքի 110 հոդվածի 1-ին մասի հատկանիշներով` «Սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը»:
ՊՆ քննչական ծառայության հասարակայնության հետ կապերի ավագ սպա Մերի Սարգսյանը «Առաջին լրատվականին» տեղեկացրեց, որ այս գործով կալանավորված են արդեն 3 անձինք. «Եղնիկներ» զորամասի ավագ լեյտենանտ Հովհաննես Հակոբյանից բացի, կալանավորվել են նաև նույն զորամասի կրտսեր սերժանտներ Էրիկ Սարգսյանը և Գևորգ Մանուկյանը: Էրիկ Սարգսյանի նկատմամբ մեղադրանք է առաջադրվել ՀՀ Քրեական օրենսգրքի 359 հոդվածի 1-ին մասի (զինվորական կանոնագրքի խախտում) հատկանիշներով, և նրա նկատմամբ որպես խափանման միջոց ընտրվել է կալանքը: Գևորգ Մանուկյանի նկատմամբ մեղադրանք է առաջադրվել ՀՀ Քրեական օրենսգրքի 375 հոդվածի 1-ին մասով (իշխանությունը չարաշահել, իշխանազանցություն կամ իշխանության անգործություն):
Հիշեցնենք, որ դիահերձմանը մասնակցելուց հետո փորձագետը «Առաջին լրատվականի» հետ զրույցում ավելի քան համոզված նշել էր, որ երեխային ծեծել են, խոշտանգել, դրան էլ անմիջապես հաջորդել է մահը. «Դա նշանակում է, որ երեխան չէր կարող ինքնասպանություն գործել, ինչպես դա փորձում են ապացուցել ՊՆ երրորդ քննչական ծառայության աշխատակիցները, մասնավորապես քննիչ Ոսկանյանը՝ քննչական ծառայության պետ Արմեն Հարությունյանի հետ: Ես մասնակցել եմ դիահերձմանը և պաշտոնապես հայտարարում եմ, որ մենք հայտնաբերել ենք մարմնական վնասվածքներ Վարյանի մարմնի վրա, վնասվածքներ դեմքի տարբեր հատվածներում, քթի ձախ և միջին հատվածի շրջանում, միջնապատի շրջանում, վնասվածքներ բերանի աջ և ձախ շրջանում` շրթունքների կողքը, վնասվածքներ ծնոտի ներքևի հատվածում, հրազենային մուտքի վնասվածքից փոքր-ինչ ներքև: Այս ամենն ինձ՝ որպես մասնագետի, պարզ հուշում է, որ կատարվածը սպանություն է, մանավանդ որ, ինչպես ֆիքսեց դատաբժիշկ Սևոյանը, վնասվածքը հասցված է մահվանից անմիջապես առաջ»,- նշել էր Մարտիրոսյանը:
