«Հավատանք, որ փոխենք» կարգախոսին չեմ հավատում և լավ եմ անում. այսօր լրագրողների հետ հանդիպմանը ասաց ԱԺ ՀՅԴ խմբակցության ղեկավար Վահան Հովհաննիսյանը:
Նա անդրադարձավ ՀՀԿ անդամ Գալուստ Սահակյանի այն արտահայտությանը, թե՝ ՀՅԴ-ն թող իր ցուցակի դարդը լացի, և ասաց. «Մենք դարդ չունենք, որ լացենք»:
Ըստ նրա՝ իրենց միակ դարդը այս երկրի ճակատագիրն է, որը մի օր կդադարի կախված լինել հանրապետական ցուցակում ներգրավված անձանցից:
Խոսելով կուսակցությունների նախընտրական ցուցակների մասին՝ Վ. Հովհաննիսյանը նշեց, որ այն կազմելիս պետք է հաշվի առնել մի շարք գործոններ, իսկ իրար հակասող խնդիրները անհրաժեշտ է լուծել։ Ցանկալի է ներգրավել այնպիսի մարդկանց, ովքեր կարող են ԱԺ-ում ֆանտաստիկ հարցեր լուծել, բայց այդ մարդկանց հասարակությունը հաճախ չի ճանաչում:
Անդրադառնալով ՀՅԴ ցուցակին՝ ասաց. «Հստակ որոշում կար, որ ՀՅԴ բյուրոյի անդամները չեն լինելու ցուցակում, միակ բացառությունը ես եմ: Բյուրոյի անդամները ոչ թե անկարող են, այլ ուրիշ հանձնարարականներ ունեն կուսակցության ներսում: Սկզբունքների բախման մեջ պետք է կարողանալ ընտրել օպտիմալ լուծում: Այնպիսի մարդիկ, ինչպիսին են Արթուր Աղաբեկյանը, Հրայր Կարապետյանը, չեն ընդգրկվել ցուցակում, որովհետև բոլորովին այլ հանձնարարականներ ունեն, իսկ Լիլիթ Գալստյանի տեղն անցողիկ է»,- մեկնաբանեց ՀՅԴ ցուցակը գլխավորող Վ. Հովհաննիսյանը:
Խոսելով ընտրությունների անցկացման որակի մասին՝ նա ասաց, որ չի սիրում Հայաստանում դրական փոփոխությունների հեռանկարը կապել արտաքին ճնշումների հետ: Ըստ նրա՝ դա պետք է լինի մեր հասարակության պահանջը, դրան պետք է հասնենք «հասարակական կռվի արդյունքում»:
«Սեփական հասարակության ճնշման տակ պետք է իշխանությունը պարտավորված լինի անցկացնել արդար ընտրություններ: Այսօր հասարակության շրջանում կա ինտրիգ՝ որոշ մարդիկ հույսը դրել են արտաքին ճնշումների վրա, որոշ մարդիկ՝ ներիշխանական հակասությունների վրա, իսկ մենք մեր հույսը դրել ենք ժողովրդի վրա՝ ժողովուրդը պետք է պայքարի արդար ընտրությունների համար»,- ասաց Վ. Հովհաննիսյանը:
Վահան Հովհաննիսյանն անդրադարձավ նաև ՀՀԿ կարգախոսին՝ «Հավատանք, որ փոխենք», և հայտնեց, որ
չի հավատում այդ կարգախոսին և լավ է անում, քանի որ պատճառներ ունի չհավատալու: Նա նշեց, որ «Առաջ Հայաստան» կարգախոսին ևս չի հավատացել:
Լրագրողի այն դիտարկմանը, թե հնարավո՞ր է ՀՅԴ-ն ընդգրկվի կոալիցիայում, Վ. Հովհաննիսյանը պատասխանեց՝ կոալիցիաները բացառված չեն, բայց՝ քիչ հավանական:
«Ես նաև ասել եմ, որ ձգտելու ենք այնքան ձայն հավաքել, որ կոալիցիայի կարիք չունենանք: Մենք տեսել ենք, թե ինչպես է կոալիցիոն հուշագիրն անտեսվում: Չեմ բացառում, որ կոալիցիոն կրտսեր պարտնյորը մոռանա իր պարտավորությունների մասին»,- նկատեց Վահան Հովհաննիսյանը:
Բանախոսի համար նաև անհասկանալի էր, թե ինչու էր պետք թեկնածություն դնել Նիկոլ Փաշինյանի դեմ և հետո հայտարարել, թե ընդդիմությունը մի թեկնածուով կարող է ներկայանալ ընտրություններին:
