Google ընկերությունն այսօր սկսել է գործադրել գաղտնիության իր նոր քաղաքականությունը, որը թույլ է տալիս, որ ընկերության ծառայություններն օգտագործեն օգտատերերի անձնական տվյալները: Եվ որպեսզի պահպանվի սեփական անձնական տվյալների գաղտնիությունը, հարկավոր է հետևել մի քանի խորհուրդների, որոնք ներկայացնում է Time-ը:
Նախևառաջ, ինչպես գրում է Time-ը, հարկավոր է արգելափակել ավտոմատ գրանցումը: Եթե օգտատերը Google-ի հաշվեհամար մուտք է գործում ավտոմատ կերպով, ապա գաղտնիությունն ապահովելու համար հարկավոր է այսուհետ զերծ մնալ դրանից:
Հարկավոր է նաև անջատել գովազդներ ստանալու ծառայությունը, որոնց համար ընկերությունն օգտագործում է հենց օգտատերի անձնական տվյալները` նրան համապատասխան գովազդներ գտնելու համար:
Գաղտնիությունը պահպանելու համար հնարավոր է նաև օգտագործվող բրաուզերում ընտրել «մասնավոր» տարբերակը, որը նշանակում է, որ բրաուզերը չի պահպանի որոնման պատմությունը, և դա էլ իր հերթին նշանակում է, որ ընկերությունը չի կարողանա օգտվել այդ պատմությունից:
Եվ երրորդ քայլով հնարավոր է պարզապես չօգտվել Google-ից որքան էլ բարդ և անհավանական դա թվա: Այնուամենայնիվ, դա լավագույն և ամենարդյունավետ տարբերակն է՝ հատկապես, երբ կան շատ այլ որոնման համակարգեր:
