Սառույցի վրա սահելը շատ օգտակար է թե՛ մեծերի, թե՛ փոքրերի համար: Մեր համաքաղաքացիները սառցե թագավորությունը վայելելու և մարզական լավ վիճակ ունենալու հնարավորություն ունեն: Նման հնարավորություն տալիս է Կ. Դեմիրճյանի անվան մարզահամերգային համալիրում գործող սահադաշտը` թե՛ սառույցի սիրահարներին, թե՛ պրոֆեսիոնալ սահորդներին: Սահադաշտի պատասխանատու, մենեջեր Բագրատ Հովհաննիսյանը մեզ հետ զրույցում նշեց, որ սահադաշտում սահելը շատ կարևոր է ուղեղի աշխատանքի համար. «Ընդհանրապես օրգանիզմի համար շատ կարևոր է սահելը, բոլոր նրանք, ովքեր ծանր աշխատանք են կատարում, ողջ օրը նստած են համակարգչի առաջ, սահադաշտը, սառույցը նրանց հնարավորություն են տալիս լիցքաթափվելու, ֆիզիկապես և հոգեպես հանգստանում են, չէ՞ որ սա սպորտաձև է, այն էլ թանկ, իսկ մենք հնարավորություն ենք տալիս, ընդամենը 2000 դրամ վճարելով, վայելել և զվարճանալ»:
Հայաստանում այս սահադաշտը միակն է, որ համապատասխանում է միջազգային չափանիշներին. մեկ ժամվա համար վճարելով 2000 դրամ և ստանալով Ձեր ոտքին համապատասխան չմուշկ ու մեկանգամյա օգտագործման բախիլներ, որոնք նախապես պետք է հագնել մինչ չմուշկ հագնելը, հնարավորություն եք ստանում վայելելու սառցե թագավորության ողջ հմայքը:
«Մեր սահադաշտը հնարավորություն է տալիս տարածությունը զգալու, սահադաշտում միաժամանակ կարող է սահել 80 մարդ: Մեծերը և փոքրերը սահում են միասին, սակայն սահադաշտը կիսվում է երկու մասի, որպեսզի իրար չխանգարեն, իսկ պարապմունքների ժամանակ երեխաները սահում են առանձին-առանձին: Բոլոր նրանք, ովքեր առաջին անգամ են սառույցի վրա հայտնվում, մեր մասնագետները ցույց են տալիս, թե ինչպես պետք է ճիշտ կանգնել և սահել»,- ասում է Բ. Հովհաննիսյանը` ավելացնելով, որ սահադաշտում սահելն առանց վնասվածքների դժվար է պատկերացնել, վնասվածքները տարբեր աստիճանի են լինում` մինչև ոտքի և ձեռքի կոտրվածքներ. «Սառույցի վրա սահելու ընթացքում լինում են ակոսներ, որոնք կարող են ձեռքը վնասել, այդպիսի դեպքերում մենք ունենք բուժօգնության կետ, որտեղ առաջին բուժօգնություն են ցույց տալիս, իսկ եթե վնասվածքը շատ լուրջ է, ապա շտապօգնության մեքենայով տուժողը տեղափոխվում է հիվանդանոց: Վնասվածք ստանում են հիմնականում նրանք, ովքեր շատ անզգույշ են, սիրում են կատակներ անել, հրում են իրար: Սահադաշտում օրական վնասվում է 3-5 սահորդ»:
