«Բարգավաճ Հայաստան» կուսակցության առաջնորդի խոսնակ Խաչիկ Գալստյանը ողջունում է կուսակցությանն անդամակցելու` Հայաստանի նախկին արտգործնախարար Վարդան Օսկանյանի որոշումը:
«Միայն ողջունել կարելի է պարոն Օսկանյանի նման քայլը,- «Ազատություն» ռադիոկայանի հետ զրույցում ասել է նա:- Նրա դիմումը կքննարկվի կուսակցությունում: Պարոն Ծառուկյանը Հայաստանում չէ: Կգա` կքննարկվի, և համապատասխան որոշում կկայացվի»:
Գագիկ Ծառուկյանի խոսնակը հավելել է, որ Վարդան Օսկանյանը ունի «լուրջ կենսագրություն, անցած ճանապարհ» և կարող է օգտակար լինել «Հայաստանի Հանրապետության զարգացման, հզորացման եւ բարգավաճման գործում»:
Հարցին, թե ԲՀԿ-ին անդամակցելու դեպքում Վարդան Օսկանյանն արդյո՞ք կընդգրկվի կուսակցության համամասնական ցուցակի առաջին տեղերում, Խաչիկ Գալստյանը պատասխանել է, որ այս պահին որոշված է միայն ցուցակի առաջին համարը, որը միանշանակորեն Գագիկ Ծառուկյանն է լինելու, մնացած հարցերը դեռ քննարկման փուլում են:
Նա բացասական պատասխան է տվել կուսակցության շուրջ վերջին զարգացումներում Հայաստանի նախկին նախագահ Ռոբերտ Քոչարյանի դերակատարությանը վերաբերող հարցին:
«Հայաստանի երկրորդ նախագահ Ռոբերտ Քոչարյանը «Բարգավաճ Հայաստան» կուսակցության հետ որևէ կապ չունի», – հայտարարել է ԲՀԿ առաջնորդի խոսնակը:
Պատասխանելով հարցին` մտահոգություն չունե՞ն, որ ԲՀԿ շարքերում Վարդան Օսկանյանին ընդգրկելը կարող է խնդիրներ առաջացնել կոալիցիոն գործընկերոջ` Հանրապետական կուսակցության հետ հարաբերություններում, Խաչիկ Գալստյանն ասել է.- «Ոչ, չունենք մենք նման մտահոգություն»:
