ԲՀԿ-ական պատգամավոր Ռուստամ Գասպարյանը որոշել է Արմավիրի մարզի թիվ 21 ընտրատարածքում մեծամասնական ընտրակարգով կրկին առաջադրել իր թեկնածությունը: Այս մասին նա ասաց «Առաջին լրատվական»-ի հետ զրույցում:
Վերջերս լուրեր տարածվեցին այն մասին, որ Սերժ Սարգսյանն արդեն իսկ Գագիկ Ծառուկյանին ասել է, որ ինքն այդ ընտրատարածքում պաշտպանելու է ՀՀԿ-ական պատգամավոր Նահապետ Գևորգյանի թեկնածությունը: Այս առնչությամբ Ռուստամ Գասպարյանը ասաց, որ Գևորգյանին ՀՀԿ-ի կողմից սատարելու հեռանկարն իր մոտ մտավախություններ չի ծնում:
«Մեզ ժողովրդի հովանավորչությունն է պետք: Ես չեմ ասում, որ ժողովրդի հովանավորչությունն ավելի շատ եմ վայելում: Ժողովուրդն իր ընտրությամբ կասի՝ ով է իր հարգանքն ու սերը վայելում: Ժողովուրդը ինչպես կորոշի, այդպես էլ կլինի թիվ 21 ընտրատարածքում: Այստեղ ոչ մի ավելորդ բան չի կարող լինել՝ ոչ ընտրակեղծիքներ և ոչ էլ խախտումներ»,- նշեց Գասպարյանը:
ԲՀԿ-ական պատգամավորը հույս հայտնեց, որ իր և Նահապետ Գևորգյանի միջև ընտրապայքարը ծավալվելու է առողջ մթնոլորտում: «Նորմալ, քաղաքակիրթ պայքար եմ կանխատեսում: Այլ կերպ չեմ պատկերացնում»,- ասաց նա:
