Թետչերին նվիրված նոր ֆիլմը՝ The Iron Lady-ն, նրան ճանաչելու հնարավորություն է ընձեռում բոլոր նրանց համար, ովքեր շատ փոքր են եղել Թետչերի՝ վարչապետ եղած տարիներին:
Daily Mail-ի հաղորդմամբ՝ ամենանշանակալիցն այն է, սակայն, որ ֆիլմն ընդհանրապես նկարահանվել է, քանզի բրիտանական վարչապետների մասին ընդհանրապես ֆիլմեր չեն նկարահանվել: Ճշմարտությունն այն է, որ թեև 2 տասնամյակ է անցել, ինչ Թետչերը լքել է իր պաշտոնը, բայց նա դեռ իր ստվերն ունի արևմտյան քաղաքականության վրա՝ առավել, քան ցանկացած այլ քաղաքական գործիչ: Թետչերը դարձել է մշակութային և քաղաքական խորհրդանիշ, սիրված և միևնույն ժամանակ՝ շատերի կողմից ատելի:
Ֆիլմի քննադատները հայտնում են, որ ֆիլմում շատ քիչ է խոսվում այդ ժամանակի քաղաքականության մասին, ավելի շատ այն ներկայացնում է Թետչերի անձնական կյանքը, սակայն ֆիլմը հենց այդ նպատակն էլ ունեցել է:
Որպես միջին խավի կին, որը փորձում էր հաջողության հասնել բարձր խավի տղամարդկանց մեջ, Մարգարետ Թետչերը ստիպված է եղել շատ դժվարություններ հաղթահարել, ավելի շատ, քան ներկա քաղաքական գործիչները:
Ամեն քայլափոխի հանդիպելով սեքսիզմի և սնոբիզմի` Թետչերը դարձել է հաստատակամության, վճռականության և ուժի մարմնավորում:
