Երեկ բավական հետաքրքրական իրավիճակ է եղել Հայաստանի լավագույն մարզիկներին և թիմերին մեծարելու հանդիսավոր արարողությանը, որ կազմակերպել է Հայաստանի ազգային օլիմպիական կոմիտեն: Բանն այն է, որ այդ միջոցառմանը մասնակցել են Սերժ Սարգսյանն ու Ռոբերտ Քոչարյանը: Սա բավական ուշագրավ է այն իմաստով, որ այս երկու գործիչները բավական երկար ժամանակ է, ինչ միասին չէին մասնակցել որևէ միջոցառման, թեև եղել էին ոչ պակաս պատեհ առիթներ:
Ի՞նչ է սա նշանակում:
Նշանակո՞ւմ է սա արդյոք, որ Ռոբերտ Քոչարյանն ու Սերժ Սարգսյանը փորձում են այդպիսով ցույց տալ իրենց համերաշխությունը, ցույց տալ, որ իրենց միջև առկա խնդիրները հարթել են և խորհրդարանական ընտրություններում հանդես են գալու միասնական ճակատով և ՀՀԿ-ն ու ԲՀԿ-ն աշխատելու են միևնույն նպատակի համար՝ իշխանության վերարտադրության ապահովում: Եվ հետաքրքրական է նաև, որ այս համատեղ ելույթը զուգադիպել է «Ժառանգության» և Դաշնակցության համատեղ հայտարարությանը, որը ողջունել են նաև Կոնգրեսն ու Ազատ-դեմոկրատները: Արդյո՞ք Սերժ Սարգսյանն ու Ռոբերտ Քոչարյանը իրենց համատեղ դրսևորումով ցույց են տալիս, որ այդ ճակատում հնարավոր համախմբման դեպքում իրենք էլ մի կողմ են դնելու իրենց տարաձայնություններն ու միասնական ճակատով դիմագրավելու են այսպես ասած համախմբված ընդդիմությանը:
Բայց, չէ՞ որ դրա մեջ է լինելու նաև Դաշնակցությունը, որը բավական լոյալ հարաբերության մեջ է Ռոբերտ Քոչարյանի հետ: Կստացվի, որ Քոչարյանը Դաշնակցության դեմ է դուրս գալու, կամ Դաշնակցությունը Քոչարյանի: Իսկ գուցե Դաշնակցությունն ընդդիմադիր համախմբման մեջ լինելու է իրականում իշխանության դեսանտը, որը թիկունքից կհարվածի հարմար պահին: Իրավիճակն իսկապես բավական բարդ է, և միգուցե հենց այդ բարդ իրավիճակն է ստիպել, որ Սերժ Սարգսյանը և Ռոբերտ Քոչարյանը նստեն միևնույն սեղանին:
Մյուս կողմից, այս իրողությունը կարող է նաև վկայել մեկ այլ բանի մասին՝ տևական ժամանակ հրաժարվելով Սերժ Սարգսյանի մասնակցությամբ միջոցառումներից, Ռոբերտ Քոչարյանը, ըստ երևույթին, փորձում էր իշխանական ճամբարին և հանրությանը ցույց տալ, որ Սարգսյանին չի ճանաչում որպես նախագահ, որպես իշխանության առաջին դեմք: Եվ հիմա վերստին մասնակցելով Սարգսյանի նախագահությամբ միջոցառումներին, Քոչարյանը ըստ երևույթին սպիտակ դրոշ է պարզում, ակնարկելով, որ ճանաչում է Սերժ Սարգսյանի նախագահությունը:
Քոչարյանի և Սարգսյանի սեղանակցությունը կարելի է իհարկե տարբեր վարկածներով մեկնաբանել, և թերևս ամենևին էլ պետք չէ անել միարժեք պնդումներ կամ եզրակացություններ, որովհետև ընտրական ամենաթեժ շրջանը Հայաստանում դեռ նոր է սկսվում և ըստ ամենայնի թե Քոչարյանին, թե Սարգսյանին դեռևս շատ անակնկալներ կլինեն ու շատ սեղաններ կլինեն, որ նրանցից կամ մեկը, կամ մյուսը ստիպված կլինեն բաց թողնել:
