ՀՔԾ հրապարակած հաղորդումը չի համապատասխանում իրականությանը: «Առաջին լրատվական»-ի հետ զրույցում նման տեսակետ հայտնեց Մարտի 1-ի զոհ Գոռ Քլոյանի հայրը՝ Սարգիս Քլոյանը, անդրադառնալով Հատուկ քննչական ծառայության հրապարակած զեկույցին:
Նա նշեց, որ իրեն հաղորդել են, թե Գոռ Քլոյանը եղել է Մարտի 1-ի անկարգությունների մասնակից Արման Ֆարմանյանի խմբից՝ Զաքար Հովհաննիսյանի հետ, որի արդյունքում էլ սպանվել է «Չերյոմուխա-7» տեսակի զենքից: Նա փաստեց, որ դա իրականությանը չի համապատասխանում: «Իմ տղան չի ճանաչել Արման Ֆարմանյանին և Զաքար Հովհաննիսյանին: Ես իմ տղայի կողքին եմ եղել: Մենք միասին ենք եղել: Ես իմ տղայից բաժանվել եմ ընդամենը մի ժամ, ես այդպիսի բան չեմ նկատել»,- մանրամասնեց Ս. Քլոյանը`ընդգծելով, որ Մարտիմեկյան հանցագործությունները կատարել են իշխանությունները:
Նրա խոսքով, առաջին հերթին Ազատության հրապարակում ծեծի են ենթարկել ժողովրդին, որը մազապուրծ փախել եկել է Մյասնիկյանի արձանի մոտ, որ հանրահավաքը շարունակի: «Այնտեղ իշխանությունը օգտագործեց ոչ համաչափ ուժեր, որի հետևանքով սպանվեցին 10 անմեղ մարդիկ: Եթե մարդը պայքարում է իր իրավունքի համար, իր կորցրած ձայնի համար, նա պայքարում է հանուն ժողովրդավարության, հանուն արդարության, հանուն իր երեխաների ապագայի»,- մեկնաբանեց Ս. Քլոյանը`հավելելով, որ այդ պայքարն է անհանգստացրել իշխանություններին, և նրանք որոշել են գնդակահարել դիմահար:
Հիշեցնենք, որ Հատուկ քննչական ծառայության կայքէջում հրապարակվել է 2008 թվականի մարտի 1-2-ին մայրաքաղաքում տեղի ունեցած դեպքերի առթիվ ՀՀ հատուկ քննչական ծառայության վարույթում քննվող քրեական գործով նախաքննական մարմնի պատրաստած տեղեկատվական հաղորդումը՝ նախաքննության կատարած աշխատանքների, արդյունքների և խնդիրների վերաբերյալ:
