Economist հանդեսի հերթական զեկույցի՝ Հայաստանին վերաբերող կետերի մասին դատողություններ անելուց առաջ ՀՀԿ-ական պատգամավոր Գագիկ Մինասյանը կարիք ունի նախ համադրել միջազգային այլ կառույցների տեսակետները և չի շտապում գնահատական տալ մեր երկիրը հիբրիդային ռեժիմ ճանաչած այդ պարբերականի քայլին: Այս մասին նա ասաց «Առաջին լրատվական»-ի հետ զրույցում:
Նշենք, որ Economist հանդեսն անցած շաբաթվա վերջին նոր զեկույց է հրապարակել աշխարհի 165 երկրներում ժողովրդավարության վերաբերյալ, որտեղ Հայաստանը կրկին դասվել է հիբրիդային ռեժիմ ունեցողների շարքում։
Այս երկրներում, ըստ Economist-ի պարզաբանման, ընտրությունները, որպես կանոն, ուղեկցվում են էական խախտումներով, կոռուպցիան գրեթե համատարած է, օրենքի իշխանությունն ու քաղաքացիական հասարակությունը` թույլ։ Նման ռեժիմներին բնորոշ են նաև լրագրողների նկատմամբ հալածանքները: Այդ ռեժիմների դատական համակարգն անկախ չէ:
Ժողովրդավարության վերաբերյալ այս գնահատականը փորձագետները տալիս են` հաշվի առնելով հինգ հիմնական չափորոշիչ, այդ թվում` ընտրությունների արդարությունը, բազմակարծությունը, կառավարման արդյունավետությունն ու հասարակության ակտիվությունը քաղաքական դաշտում։ Ըստ այդմ՝ այս տարվա զեկույցում Հայաստանը այս հինգ չափորոշիչներով ստացել է նույն գնահատականները, ինչ նախորդ` 2010 թվականին:
«Հայաստանի մասին տարվա ընթացքում բազմաթիվ այլ վերլուծություններ այլ կենտրոնների կողմից ևս եղել են, ընդ որում՝ բավականին դրական: Սա է պատճառը, որ ես պետք է կարողանամ համադրել այն հիմքերը, որոնք տվյալ պարբերականին թույլ են տվել նման եզրահանգման գալ: Այն հատվածը, ուր խոսում են ընտրական խախտումների մասին, առհասարակ հնարավոր չէ որևէ բան ասել, քանի որ անցած տարվա ընթացքում Հայաստանում ընտրություններ տեղի չեն ունեցել: Այս առումով հանդեսը իրադարձություններից հետ է մնացել: Հիմքերը պետք է ուսումնասիրել նաև կոռուպցիայի առկայության, ինչպես նաև դատական համակարգի անկախ չլինելու մասին նրանց դատողությունները մեկնաբանելու համար»,- ամփոփեց պատգամավորը:
