Պաղեստինի դրոշն այսօր առաջին անգամ բարձրացվել է ՄԱԿ-ի գործակալության` ՅՈՒՆԵՍԿՕ-ի Փարիզում գտնվող գլխավոր գրասենյակի դիմաց` որպես դիվանագիտական հաղթանակի խորհրդանշան` չնայած ԱՄՆ-ի և Իսրայելի խիստ ընդդիմությանը:
AFP-ն գրում է, որ արարողությանը ներկա Պաղեստինի նախագահ Մահմուդ Աբբասն ասել է, որ ՄԱԿ-ի կրթության, գիտության և մշակույթի հարցերով զբաղվող գործակալությանն անդամակցումը իր պետության առաջին կարևոր ճանաչումն է, և որ ինքը հույս ունի, որ աշխարհի այլ ղեկավարները ևս կհետևեն այդ օրինակին:
«Սա Պաղեստինի առաջին ճանաչումն է։ Հուսով եմ, որ սա լավ օրինակ կլինի, որպեսզի այլ միջազգային կազմակերպություններ ևս ճանաչեն Պաղեստինը»,– ասել է Աբբասը:
ՅՈՒՆԵՍԿՕ-ի կողմից ընդունվելը, սակայն, ոչ մի կերպ չի ազդում ՄԱԿ-ին Պաղեստինի ամբողջական անդամակցության վրա: Նրանք Անվտանգության խորհրդի 15 ձայներից 9-ի կարիքը կունենան, բայց ԱՄՆ-ը հստակ ասել է, որ մերժելու է հայցը:
Աբբասն ասել է, որ ՄԱԿ-ին ամբողջական անդամակցելու և այլ միջազգային կազմակերպությունների կողմից ճանաչվելու իրենց փորձերն ու ջանքերը շարունակվում են:
