Լոնդոնի Savoy հյուրանոցում դեկտեմբերի 13-ին ցուցադրվում է իմպրեսիոնիստ նկարիչ Կլոդ Մոնեի «Վաթերլոոյի կամուրջը» կտավը, որը նկարվել էր 1901 թվականին այդ հյուրանոցի սենյակում:
Ինչպես հայտնում է BBC News-ը, Մոնեի աշխատանքը թանգարանում մնալու է ընդամենը երեք օր:
Մոնեն կամուրջը նկարել է հունվարի 25-ին 618 սենյակից, որն այժմ կրում է նրա անունը: Նկարի առաջնային պլանում պատկերված է նավակ, իսկ Թեմզայի հարավային ափին` աշտարակներ:
Նկարը հյուրանոցին է տրամադրել Trinity House թանգարանը, որը այն գնել էր այս տարի: Մինչև այդ՝ 1947 թվականից ի վեր, «Վաթերլոոյի կամուրջը» գտնվում էր Շվեյցարիայում` մասնավոր հավաքածուում: The Guardian պարբերականի տվյալներով՝ նկարը գնահատվում է 1.5 միլիոն ֆունտ ստերլինգ (2,3 միլիոն դոլար):
Կլոդ Մոնեն բազմիցս ուղևորվել է Savoy հյուրանոց և ամեն անգամ նկարել է Թեմզայից երևացող տեսարանը:
Ներկայումս հայտնի է 26 պահպանված աշխատանք, որոնք արվել են այս հյուրանոցից: Վերջին անգամ Savoy հյուրանոցում արված կտավների մի մասը ցուցադրվել է Լոնդոնում 2007 թվականին:
