Վաղը` հոկտեմբերի 7-ին, Խնկո Ապոր անվան ազգային մանկական գրադարանում «Դարձ առ գիրք» փառատոնի շրջանակում կբացվի գրքի տոնավաճառ, որին կմասնակցեն Հրատարակիչների ասոցիացիայի գրեթե բոլոր անդամները` շուրջ 40 հրատարակիչ: Ցուցադրվելու են վերջին երկու տարում Հայաստանում հրատարակված լավագույն գրքերը: Այս մասին այսօր լրագրողների հետ հանդիպմանը հայտարարեց Հրատարակիչների ազգային ասոցիացիայի նախագահ Մկրտիչ Կարապետյանը:
Նրա խոսքով` արդեն Երևանում կազմակերպվել է գրքերի 7 տոնավաճառ, որոնց նպատակը գիրք կարդալու սովորույթը հայերին վերադարձնելն է, քանի որ շատերը տեղյակ էլ չեն նոր հրատարակվող գրքերից: «Գիրքը մարդկանց չի հասնում: Երբ տեսնում, զարմանում են»,- նշեց նա` հույս հայտնելով, որ հաջորդ տարի, կապված Երևանը Գրքի միջազգային մայրաքաղաք հռչակելու փաստի հետ, որևէ բան գոնե կփոխվի:
«Անտարես» հոլդինգի տնօրեն Արմեն Մարտիրոսյանն էլ, ներկայացնելով հոկտեմբերի 20-ին կայանալիք «Պետություն-գրահրատարակչություն-գրախանութ» սեմինար-բանավեճը, նշեց, որ այնտեղ բարձրացվելու է այն հարցը, թե պետությունը, լինելով ամենամեծ գնորդը, ինչո՞ւ է շրջանցում գրախանութները, ինչո՞ւ են Հայաստանում փակում գրախանութները: Նրա խոսքով` այսօր գրողները, թարգմանիչները մեծ խնդիրներ ունեն՝ կապված օրենքի չիմացության հետ: «Թարգամնիչը վերցնում, գիրք է թարգմանում ու գալիս է հրատարակչի մոտ` առանց իմանալու, որ նա իրավունք չուներ թարգմանել այդ գիրքը, մինչև չգնի գիրքը թարգմանելու հեղինակային իրավունքը: Եղել են դեպքեր, երբ հեղինակը հրաժարվում է վաճառել իր հեղինակային իրավունքը»,- ասաց նա:
Մարտիրոսյանը նաև հարց բարձրացրեց, թե ինչո՞ւ Հեքիաթի օրվա շրջանակում հեքիաթ չեն կարդում նաև երկրի նախագահն ու վարչապետը, քանի որ դա նույնպես շատ լուրջ ազդակ կլինի ամբողջ հանրության համար ու իսկապես կլինի «Դարձ առ գիրք», իսկ մեզանում այդ ամենը դրված է մշակույթի նախարարության ուսերին:
«Հանրապետության առաջին դեմքերը պետք է ցույց տան, որ նրանք կապված են գրքի հետ, անգամ եթե կապված չեն, պետք է ցույց տան, որ կապված են»,- ընդգծեց նա:
