Թուրքական Haber Türk թերթի փոխանցմամբ՝ Մակեդոնիայից վերադարձած Թուրքիայի վարչապետ Էրդողանը հայտարարել է, որ մի շարք գերմանական հիմնադրամներ քրդական «Խաղաղություն ու ժողովրդավարություն» կուսակցության (ԽԺԿ) ու գլխավոր ընդդիմադիր ուժ հանդիսացող Ժողովրդա-հանրապետական կուսակցության (ԺՀԿ) միջոցով գումարներ են փոխանցում Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) հաշվին։
Էրդողանը, սակայն, չէր նշել գերմանական այդ հիմնադրամների անունները։ Էրդողանի այս հայտարարությանն անմիջապես արձագանքել է ԺՀԿ փոխնախագահ Գյոքհան Գյունայդընը.
«Մենք վարչապետին կոչ ենք անում ապացուցել ասածը։ Վարչապետը չպետք է հադես գա մեղադրանքներով։ Նրա պարտականությունների մեջ է մտնում այդպիսի դեպքերի հետաքննումը։ Եթե վերլուծենք վարչապետի ելույթը, ապա ակնհայտ կդառնա, որ նա դրանով երկրի այժմեական խնդիրների վրայից հասարակության ուշադրությունը շեղելու նպատակ էր հետապնդում։ Մենք նրան կոչ ենք անում ապացուցել ասածը»:
