Ռուսական Regnum լրատվական գործակալության փոխանցմամբ՝ Ադրբեջանի ռազմական վերլուծական հետազոտությունների կենտրոնը ներկայացրել է «Տարածաշրջանի երկրների ռազմական դոկտրիններ – դիմակայության կայունություն կամ վտանգավորություն» խորագրով նախագծի ամփոփիչ փաստաթուղթը։
Նախագծի իրագործմանը մասնակցել են մոտ 10 փորձագետներ։ Ադրբեջանցի գնդապետ Յըլդըրըմ Մամեդովը հայտարարել է, որ այդ նախագծի շրջանակներում մանրամասնորեն ուսումնասիրվել են Ռուսաստանի, Թուրքիայի, Հայաստանի, Վրաստանի ու Ադրբեջանի ռազմական դոկտրինները և անվտանգության հայեցակարգերը.
«Ներկայումս Հարավային Կովկասը երկրագնդի ամենաանկայուն անկյուններից մեկն է։ Այստեղ բախվում ենք քաղաքակրթական, մշակութային ու աշխարհաքաղաքական շահեր։ Այստեղ առկա է երեք «սառեցված» հակամարտություն՝ Ղարաբաղյան, Աբխազական ու Հարավ-օսական։ Դրանց հետ մեկտեղ, կան նաև այլ լուրջ խնդիրներ, որոնք ազդում են տարածաշրջանի կայունության վրա։
Խոսքը գնում է իրանական միջուկային ծրագրի թափանցիկ չլինելու, Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK), ինչպես նաև Հյուսիսային Կովկասի ու Ռուսաստանի միջև եղած խնդիրների մասին։
Ռուսաստանը 350,000-անոց բանակ է տեղակայել Հյուսիսային Կովկասում, իսկ Իրանը երկու կանոնավոր կորպուս է տեղակայել Ադբեջանի սահմանին։ Վերջին շրջանում տարածաշրջանում ընթանում է ռազմականացման արագ գործընթաց, ինչի մասին են վկայում Հայաստանում, Իրանում ու Ադրբեջանում անցկացված զորահանդեսները։
Հայաստանում անցկացված զորահանդեսը նաև ի ցույց դրեց նոր մարտահրավերների առկայությունը, քանի որ Գյումրիում գտնվող ռուսական 102-րդ ռազմաբազային պատկանող С-300 զենիթա-հրթիռային կոմպլեքսները հանկարծ հայտնվեցին հայկական զինված ուժերի տրամադրության տակ։ Դա վկայում է, որ Ռուսաստանը շահագրգռված է տարածաշրջանային խնդիրների լուծման մեջ, սակայն որոշակի մտահոգիչ ձևով։
Հայաստանի ռազմական դոկտրինն իրենից ներկայացնում է պարզ և մանրամասն մտածված փաստաթուղթ, քանի որ նրա նախապատրաստմանը մասնակցել են ամերիկացի փորձագետները։ Այդ փաստաթղթում ճշգրիտ ձևով նշված են երկրի բարեկամներն ու թշնամիները, թիրախները։ Բացի այդ, դրանում նշված է, թե որ ռազմական կառույցներում է Հայաստանն իր ներկայությունը տեսնում՝ կայուն ապագա ապահովելու համար։ Դժբախտաբար, Ադրբեջանի ռազմական դոկտրինում մենք այդպիսի նրբությունների ականատես չենք եղել»։
