Ֆրանսիայի արտգործնախարար Ստեֆան Սեժուրնեն Չինաստանի արտգործնախարար Վան Իի հրավերով կմեկնի Չինաստան: Այցը տեղի կունենա ապրիլի 1-ին: Դա կլինի Ֆրանսիայի նոր արտգործնախարարի առաջին այցը Չինաստան: Չի բացառվում, որ այցի ընթացքում կնախապատրաստվի Չինաստանի նախագահ Սի Ցզինպինի այցը Ֆրանսիա: Համենայն դեպս, վերջին շրջանում միջազգային մամուլում տարածվեց խոսակցություն այդ մասինն, որ սպասվում է Չինաստանի նախագահի այց Փարիզ: Ըստ Պոլիտիկո պարբերականի, Սի Ցզինպինի այցը Փարիզ սպասվում է մայիսի սկզբին: Չի բացառվում, որ դրա հաստատումը կախված է լինելու ապրիլի 1-ին Ֆրանսիայի արտգործնախարարի Պեկին կատարելիք այցի արդյունքից:
Այդ այցը ուշագրավ է նաեւ նրանով, որ մեկ տարի առաջ Պեկին էր այցելել Ֆրանսիայի նախագահը: 2023-ի ապրիլին Էմանուել Մակրոնը այցելեց Չինաստան, որտեղ բացի ֆրանս-չինական բարձր մակարդակի բանակցությունից, տեղի ունեցավ նաեւ մեկ այլ ուշագրավ շփում՝ ֆրանս-իրանական: Մակրոնի պատվիրակության կազմում էր Ֆրանսիայի այն ժամանակ արտգործնախարար Կատրին Կոլոնան, որը Պեկինում հանդիպել էր Մակրոնի այցի օրերին այնտեղ գտնվող Իրանի արտգործնախարար Աբդոլահիանի հետ: Սա հատկանշական հանգամանք էր, որը անշուշտ բավականին հետաքրքրություն է ներկայացնում նաեւ Հայաստանի համար, թեեւ Հայաստանի համար հետաքրքրության առարկա է նաեւ չին-ֆրանսիական հնարավոր բարձր մակարդակի շփումը:
Դրա բովանդակությունը անշուշտ էական ազդեցություն է ունենալու Եվրոպայից-Չինաստան ամբողջ պերիմետրով, իսկ դա ընդգրկում է նաեւ Կովկասը, թեեւ ամենեւին ոչ միարժեք տրամաբանությամբ, որովհետեւ այստեղ պետք է նկատի ունենալ առնվազն չորս այլ դերակատարների վերաբերմունքի եւ դիրքավորման հարցերը՝ Հնդկաստան, Թուրքիա, Ռուսաստան, Բրիտանիա: Այս համատեքստում ի դեպ ուշագրավ է, որ առաջիկկայում սպասվում է նաեւ Ռուսաստանի նախագահ Պուտինի այց Չինաստան: Ժամկետ հստակ նշված չէ, սակայն մեծ հավանականությամբ Պուտինը առաջին այցը կկատարի Չինաստան՝ վերընտրությունից հետո, այլ ոչ թե Թուրքիա: Այնպես, ինչպես իր վերընտրությունից հետո առաջին արտերկրյա այցը Սի Ցզինպինը կատարեց Ռուսաստան՝ 2023 թվականի մարտին: Ի դեպ, Ֆրանսիայի նախագահ Մակրոնը մեկ տարի առաջ Չինաստան էր մեկնել հենց Սի Ցզինպինի Ռուսաստան այցից երկու շաբաթ անց: Արդյո՞ք Սի Ցզինպինն էլ Ֆրանսիա կմեկնի Պուտինի Չինաստան այցից օրեր անց:
