«Արևմտյան տերությունների տեսանկյունից Լիբիան դիտարկվում էր որպես անվերահսկելի տարածք, որը սպառնալիք էր համաշխարհային հանրությանը, և այնտեղ կատարվող դեպքերով, փաստորեն, ևս մեկ անվերահսկելի օջախ մարեց»,- «Առաջին լրատվականի» հետ զրույցում գնահատելով Լիբիայի դեպքերը համաշխարհային անվտանգության տեսանկյունից՝ կարծիք հայտնեց Ռազմավարական և ազգային հետազոտությունների հայկական կենտրոնի փորձագետ Սարո Սարոյանը:
Փորձագետի գնահատմամբ՝ համաշխարհային անվտանգությունը լայն հասկացություն է, և այն այսօր հիմնականում որոշվում է աշխարհաքաղաքական ուժերի կողմից: Սարոյանի խոսքերով, Լիբիայի դեպքերը եվրոպական անվտանգության տեսանկյունից որոշակի խնդիրներ լուծեցին: Նրա դիտարկմամբ՝ աշխարհաքաղաքական ուժերի տեսանկյունից որքան երկրագունդը կառավարելի է, այնքան անվտանգությունը ավելի բարձր հիմքերի վրա դրված կլինի:
Սարոյանը նշեց, որ եթե Realpolitik-ի տեսանկյունից դիտարկենք, ապա աշխարհաքաղաքական ուժերի համար Լիբիայի նման պետությունները և որոշ միավորումներ համաշխարհային անվտանգության համար սպառնալիք են. «Մերձավոր Արևելքում կան որոշակի ուժեր, որոնք մտնում են Արևմուտքի «սև ցուցակի» մեջ: Հայտնի են կազմակերպություններից «Ալ-Քաիդան»: Այդ ցուցակում են նաև Սիրիան, Իրանը, որոշակի մտադրություններ կան ՀԱՄԱՍ-ի հետ կապված»:
Այդուամենայնիվ, ըստ Սարոյանի, եթե օբյեկտիվ տեսանկյունից դիտենք խնդիրը, ապա շատ դեպքերում նշված երկրներն ամենևին էլ համաշխարհային անվտանգությանը սպառնալիք չեն: Ըստ Սարոյանի՝ Սիրիան, ինչպես նաև Իրանը, երբեք էլ համաշխարհային անվտանգության հայեցակարգից ելնելով իրենցից վտանգ չեն ներկայացրել, այլ ընդհակառակը՝ հավասարակշռող դեր են ունեցել:
