«Հիզբուլլահ»-ի առաջնորդ Հասան Նասրալլահը Լիբանանի նախկին վարչապետ Ռաֆիկ Հարիրիի սպանության գործով նախօրեին հրապարակված մեղադրական արձանագրության կապակցությամբ հայտարարել է, որ այս սպանության մեջ կասկածվող «Հիզբուլլահ»-ի 4 անդամների մեղքն ապացուցված չէ, և դատարանը միայն անուղղակի ապացույցներ ունի: Այս մասին տեղեկացնում է aljazeera.net-ը:
Քննությունը հայտնաբերել է Հարիրիի սպանությանը հաջորդող օրերին «Հիզբուլլահ»-ի 4 անդամների հեռախոսազրույցների ձայնագրությունը, սակայն Նասրալլահը հայտարարել է, որ դա դեռ չի նշանակում, որ հեռախոսով զրուցում են «Հիզբուլլահ»-ի անդամները: Նույնիսկ հայտնի չի, թե ում են պատկանում հեռախոսները:
Ըստ Նասրալլահի՝ մեղադրական արձանագրության մեջ առկա «Հնարավոր է, որ…», «Կարելի է եզրակացնել, որ…» արտահայտություններն ինքնին պարզ են դարձնում, որ «Հիզբուլլահ»-ի անդամների մեղքն ապացուցված չէ, և քննությունն ընթացել է ոչ օբյեկտիվ:
Հիշեցնենք, որ Լիբանանի նախկին վարչապետ Ռաֆիկ Հարիրին սպանվել էր 2005 թ.: Նրա ավտոմեքենայի դիմաց ռումբ էր պայթեցվել:
