Հայաստանում ֆրանսիական համալսարանը գնում է վերաբրենդավորման: Ուսումնական հաստատությունը ներկայանալու է նոր լոգոյով, նորացված պաշտոնական կայքով, որն ավելի շատ է համապատասխանելու համալսարանի նոր ռազմավարությանը:
«Արմենպրես»-ի մամուլի սրահում հրավիրված ասուլիսում Հայաստանում ֆրանսիական համալսարանի ռեկտոր, պրոֆեսոր Բերտրան Վենարը նշեց, որ առաջարկվող փոփոխությունները նպաստելու են համալսարանի որակի բարձրացմանը, նոր հնարավորություններ են ընձեռվելու ուսանողներին:
«2020 թվականը դժվարին շրջան էր Հայաստանի համար: Հայաստանում Ֆրանսիական համալսարանը որոշեց ձեռքերը ծալած չնստել, այլ առաջ գնալ ու անել ավելին: 2020 թվականի դեկտեմբերին մշակվեց մեր նոր ռազմավարական պլանը, որը կոչվեց «Հորիզոն UFAR 2021-2025»: Այս ռազմավարության կարևոր բաղադրիչներից է որակի բարելավումը տարբեր ոլորտներում»,- ասաց համալսարանի ռեկտորը: Որակի բարելավմանն ուղղված աշխատանքներ են նախատեսվում համալսարանի գործունեության յուրաքանչյուր ուղղությունում:
Բերտրան Վենարի խոսքով, տարբեր գերատեսչությունների ներկայացուցիչների հետ հանդիպումներում հաճախ է նշվում այն մասին, որ երկիրը կարիք ունի բարձր որակի կրթություն ստացած երիտասարդների, որոնք կնպաստեն Հայաստանի զարգացմանը: Հայաստանում ֆրանսիական համալսարանի ռազմավարական ուղղությունների մշակումը հենց այդ նպատակն ունի, այսինքն՝ պատասխանել այն կարիքներին, որոնք առկա են աշխատաշուկայում: Համալսարանը, նոր ռազմավարությանը համահունչ, աշխատանքներ է նախատեսում գիտահետազոտական, մանկավարժական ուղղություններում: Խնդիր է դրված բարելավել նյութատեխնիկական պայմանները, զարգացնել համագործակցությունը, վերապատրաստել դասախոսներին:
«Ես համարում եմ, որ Հայաստանում ֆրանսիական համալսարանը դուռ է դեպի աշխարհ, որովհետև մի քանի լեզուների իմացությունը մեր կարևոր բաղադրիչներից է: Մեզ մոտ ընդունվողների 90 տոկոսից ավելին ֆրանսերեն չի իմանում, սակայն ավարտելուց ոչ միայն տիրապետում է ֆրանսերենին, այլև սովորում է անգլերեն, ցանկության դեպքում` նաև իսպաներեն»,- ասաց Բերտրան Վենարը:
Համալսարանի գործունեության կարևոր ուղղություններից է սոցիալական պատասխանատվությունը: Այս անգամ թիրախում զինվորներն են: Մշակվել է հատուկ պլան, որ զինվորական ծառայությունից վերադարձողներն արագ վերաինտեգրվեն ուսումնական պրոցեսում:
Համալսարանը կարևորում է ուսանողներին մինչև աշխատաշուկա ուղեկցելը: 2020 թվականին համալսարանի շրջանավարտները աշխատաշուկա դուրս եկան բարդ շրջանում, սակայն արդյունքները երկար սպասեցնել չտվեցին: Ավարտելուց 6 ամիս հետո կատարված հարցումները ցույց են տալիս, որ նրանց միայն 3 տոկոսն է աշխատանք փնտրում:
Հայաստանում ֆրանսիական համալսարանը ձգտում է իր ներդրումն ունենալ տեխնոլոգիական ոլորտում մասնագետներ պատրաստելու հարցում: Համալսարանը վերջերս կյանքի է կոչել «Արհեստական բանականություն» մագիստրոսական ծրագիրը
«Արհեստական բանականությունը մի ոլորտ է, որի կամ հետևանքներն ես կրում կամ այն օգտագործում ես: Այդ ռեսուրսները չունեցողները, ցավոք, կրում են հետևանքները: Բեկումնային այս ժամանակաշրջանում, երբ արհեստական բանականությունը ներխուժել է ամեն ոլորտ, պետք է քայլեր ձեռնարկել ու պատասխանել այդ մարտահրավերին: Համալսարանի պատասխանը եղավ նոր մագիստրոսական ծրագրի մեկնարկը, որին շատ արագ կհետևի ասպիրանտուրայի ծրագիրը: Բոլոր ներդրումներն անում ենք, որ 2022 թվականին ունենանք մեր առաջին ուսանողներին»,- ասաց նա:
Նոր փոփոխություններն ու ծրագրերը կյանքի կոչելով՝ համալսարանն ակնկալում է ներգրավել ավելի շատ ուսանողների, մեծացնել ճանաչելիությունը, ավելի լավ որակի կրթություն տրամադրել, ընտրության լայն հնարավորություն ընձեռել:
