Գերմանիայի կառավարությունը երկրի բնակիչներին կորոնավիրուսի դեմ պատվաստանյութերով ապահովելու հարցերի հատուկ լիազոր ներկայացուցիչ նշանակելու որոշում է ընդունել: Փետրվարի 19-ին այդ մասին հայտնել է Der Spiegel հրատարակությունը:
Պատճառը, ինչպես գրում է Der Spiegel-ը, վերջին մի քանի շաբաթում պատվաստանյութերի արտադրությունը բազմիցս ընդհատվելը և դրա հետևանքով պատրաստուկների մատակարարումների ուշացումներն են:
Նոր պաշտոնը կզբաղեցնի Քրիստոֆ Կրուպը՝ Անշարժ գույքի դաշնային գործակալության վարչության մամուլի քարտուղարը: Նրա առաջնային պարտականությունների մեջ կմտնի պատվաստանյութեր արտադրողների հետ կապի պահպանումը և արտադրական կարողությունների մեծացման գործում նրանց օգնության ցուցաբերումը: Բացի դրանից, հրատարակության տվյալներով՝ հատուկ ներկայացուցիչը պետք է երաշխավորի, որ ընկերությունները ապահովված լինեն պատվաստանյութերի արտադրության համար հումքի բավարար քանակով, և որ պատրաստուկների մատակարարումներն իրականացվեն առանց ընդհատումների: Սպասվում է, որ Կրուպը գործին ձեռնամուխ կլինի արդեն մարտի 1-ին:
Նա կենթարկվի ԳԴՀ-ի էկոնոմիկայի և էներգետիկայի նախարար Պետեր Ալտմայերին:
Գերմանիայում կորոնավիրուսի դեմ պատվաստումը սկսվել է դեկտեմբերի վերջին: Ներկայումս պատվաստում է ստացել բնակչության ընդհանուր թվի ավելի քան 3,5 տոկոսը: Այժմ երկրում օգտագործվում են BioNTech – Pfizer կոնսորցիումի մշակած պատվաստանույթը, Moderna և AstraZeneca ընկերությունների պատրաստուկները: Փետրվարի 17-ին ԳԴՀ առողջապահության նախարար Յենս Շպանն ընդգծել է, որ երկրում COVID-19-ի դեմ պատվաստումը մնում է կամավոր, հաղորդել է ՏԱՍՍ-ը:
