Պատերազմը բարդություններ է առաջացրել նաև Սփյուռքի հետ աշխատանքում: Արդեն հաղթահարման նշույլներ կան: Որքան համայնքը ֆիզիկապես հեռու է Հայաստանից, այնքան ավելի դժվար է հաղթահարվում պատերազմի ցնցումը, շոկը, հիասթափությունը, վիշտը: «Առաջին լրատվական»-ի հետ զրույցում այս մասին ասաց ՀՀ Սփյուռքի գործերի գլխավոր հանձնակատար Զարեհ Սինանյանը:
Սփյուռքահայերի տրամադրությունների վրա ազդեցությւն են թողնում Հայաստանից կազմակերպված տեղեկատվական արշավները: Սինանյանի խոսքով՝ մանավանդ Միացյալ Նահանգների համայնքում գերակայում է նախորդ ռեժիմին պատկանող մամլո միջոցների հետ առնչությունը, որոնք Հայաստանի իրականությունից տարբերվող՝ ալտերնատիվ իրականություն են ներկայացնում: «Հայաստանում առանց այն էլ խնդիրներ շատ կան, պետք չէ դրանք «ծաղկացնել»: Առկա մարտահրավերները շատ լուրջ են, բայց նաև հորինում են: Օրինակ՝ ընդդիմադիրների ցույցերը ներկայացվում են պերճ գույներով և մթնոլորտը թունավորված են պահում, իսկ ովքեր Լոս Անջելեսից գալիս են այստեղ և վերադառնում, բոլորովին այլ կերպ են ներկայացնում իրականությունը»:
Սինանյանի խոսքով՝ Սփյուռքը գնալով առողջանում է, նրա հետ աշխատանքի ծավալները մեծանում են: «Սփյուռքի հետ աշխատանքի մեր տեսլականը չի փոխվել՝ ի սկզբանե եղել է առավելագույնս ներգրավվածությունն ու մասնակցայնությունն ապահովելու, միասին հաջողությունները կիսելու տրամաբանությունը: Միշտ դեմ ենք եղել այն տրամաբանությանը, որ տասնամյակներ շարունակ գոյություն է ունեցել,երբ ասել են՝ փողը տվեք, բայց ձայններդ կտրեք, կամ մենք ձեզանով կհետաքրքրվենք, երբ որ ձեր օգնության կարիքն ունենանք: Մենք կողմ ենք եղել նաև մեր երկրի կառավարման համակարգում Սփյուռքի մասնագիտական ներուժի ներգրավմանը:
Միայն հայաստանյան ռեսուրսով չենք կարողանալու հաղթահարել մեր դժվարությունները, իսկ եթե ներգրավենք Սփյուռքի հսկայական ներուժը, մարդուժը, կկարողանանք հաղթահարել»,- նշեց Սինանյանը:
«Ինֆորմացիան տեղ հասցնելու իմաստով մենք մրցում ենք մի ամբողջ համակարգի հետ, որը մուլտիմիլիոնանոց համակարգ է և հիմնված է Հայաստանի ժողովրդից թալանված ռեսուրսների վրա և այսօր օգտագործցում է հայ ժողովրդի, պետության դեմ. ժողովրդի դեմ ռևանշ են ուզում»,- ընդգծեց Սփյուռքի գործերի գլխավոր հանձնակատարը:
Մանրամասն՝ տեսանյութում:
