Ամեն ինչ չափի մեջ է օգտակար, եթե իհարկե խոսքը չի վերաբերում գունավոր գազավորված ըմպելիքներին և ֆաստ ֆուդին, որոնց օգտագործումն ամռան այս շոգերին (և ընդհանրապես) բացասաբար է ազդում մաշկի վրա: Այսօր այս մասին լրագրողներին ասաց «Հելիոս դերմատո» կոսմետոլոգիական բժշկական կենտրոնի էսթետիկ բժշկության բաժնի ղեկավար, բժիշկ-կոսմետոլոգ Զարուհի Փափանյանը:
Ամռան այս շոգերին նա խորհուրդ տվեց ցանկացած տիպի մաշկի համար կիրառել հատուկ այդ նպատակով ստեղծված կոսմետիկ միջոցներ, թեև նշեց, որ յուրաքանչյուր մաշկի նկատմամբ պետք է ցուցաբերել անհատական մոտեցում: Նա խորհուրդ տվեց ամեն երեկո շպարից ազատել մաշկը: 35 տարեկանից բարձր անձանց խորհուրդ տվեց օգտագործել սնուցող քսուք ձմռանը, իսկ ամռանը դրա անհրաժեշտությունն այլևս չկա, և այն պետք է փոխարինել խոնավեցնող քսուքներով: Բժիշկ կոսմետոլոգը խորհուրդ տվեց առավոտյան մաշկը մաքրել տոնիկով և քսել խոնավեցնող քսուք:
Ինչ վերաբերում է ծովափնյա հանգստին՝ նա նշեց, որ մեկնելուց առաջ ցանկալի չէ մաշկը ենթարկել տրավմատիկ միջամտության՝ կոչ անելով օգտագործել արևից պաշտպանող քսուքներ, որոնց վրա պետք է գրված լինի SPS ու թիվ, որը պետք է լինի 23-30-ի սահմաններում: Անհրաժեշտ է արևահարվել աստիճանաբար, որպեսզի մաշկն այրվածք չստանա: Նա խորհուրդ տվեց օգտագործել UBA, UBB տառեր կրող արևապաշտպան քսուքներ: Մասնագետը խորհուրդ տվեց արևահարվել միայն առավոտյան մինչև 11-ը և երեկոյան 17-ից հետո: «Ոչ մի դեպքում չի կարելի պառկել արևի ուղիղ ճառագայթների տակ: Արևը կյանք է, ջերմություն է, լույս է, բայց դա չի նշանակում, որ կարող ենք չարաշահել այն»,- ասաց նա՝ ավելացնելով, որ հակառակ պարագայում մաշկը կթառամի, կջրազրկվի, կարող են առաջանալ անգամ մաշկի ուռուցքային հիվանդություններ: Նրա խոսքով, փոքրերին ևս ամռան շոգերին պետք է հատուկ խնամք ցուցաբերել՝ արգելելով փողոց դուրս գալ ցերեկային ժամերին: Նա խորհուրդ տվեց փոքրիկների մաշկը պատել արևից պաշտպանող քսուքներով:
Ինչ վերաբերում է սոլյարիում «արևահարվելուն», ապա նա կոչ արեց չօգտվել այդ ծառայությունից, քանի որ բացի ճառագայթումից՝ արտադրվում է նաև ազոտ: Այնուամենայնիվ, եթե մարդը որոշել է դիմել սոլյարիում արևահարվելուն, ապա նա խորհուրդ տվեց փակել մաշկի վրա գտնվող բոլոր խալերը և գոյացությունները:
