Ադրբեջանական Salam News գործակալության փոխանցմամբ՝ Իսրայելում տեղի է ունենում կառավարությանը կից ռազմավարական ֆորումի անդամների նիստը։ Դրանում քննարկվում են «Մավի Մարմարա»-ի միջադեպի կապակցությամբ Թուրքիայից ներողություն խնդրելու հարցը։
Թուրքական լրատվամիջոցները նշում են, որ նախարարները, որոնց պայմանականորեն անվանում են «ութնյակ», այդ հարցի վերաբերյալ տարբեր կարծիքներ ունեն։ Մասնավորապես, Իսրայելի արտգործնախարար Ավիգդոր Լիբերմանը և ռազմավարական պլանավորման նախարար Մոշե Յաալոնը հանդես են գալիս Թուրքիայից ներողություն խնդրելու դեմ, մինչդեռ վարչապետ Բենիամին Նեթանյահուն, պաշտպանության նախարար Էհուդ Բարաքը և «Մոսսադ» հատուկ ծառայության պետ Դան Մերիդորը հակված են Թուրքիայից ներողություն խնդրելուն։
Հիշեցնենք, որ ավելի վաղ նշվում էր, որ եթե մինչև հուլիսի 27-ը Իսրայելը ներողություն չխնդրի Թուրքիայից, ապա Էրդողանը գործի է գցելու իր «Բ» պլանը, որը կազմված է երեք բաղկացուցիչ մասերից.
ա) իրավական պայքար – Թուրքիան «Մավի Մարմարա»-ի միջադեպի ժամանակ իսրայելցի զինծառայողների գործողությունների դեմ դիմելու է միջազգային դատարան։
բ) երկկողմանի հարաբերություններ – Թուրքիան պատրաստվում է նվազեցնել Իսրայելի հետ դիվանագիտական շփումները՝ ընդհուպ մինչև հարաբերությունների խզում։ Թուրքիան կարող է չընդունել Իսրայելի նորանշանակ դեսպանին։ Հարված կհասցվի նաև թուրք-իսրայելական տնտեսական հարաբերություններին։
գ) Գազայի հատված – Եթե Իսրայելը չվերացնի Գազայի հատվածի շրջափակումը, ապա Թուրքիան պատրաստվում է միջազգային բոլոր հարթակներում քաղաքական պայքար մղել Իսրայելի դեմ։