Արդարադատության նախարար Ռուստամ Բադասյանը լրագրողների հետ ճեպազրույցում անդրադարձավ հարցին, թե Ազգային ժողովի նախագահ Արարատ Միրզոյանի կողմից «Սահմանադրական դատարանի մասին» օրենքում փոփոխություններ և լրացումներ կատարելու մասին օրենքը ստորագրելուն ի՞նչ քայլեր են հաջորդելու։
«Իրականում սրան հաջորդող քայլեր չկան, եթե դուք նկատի ունեք առաջադրումները, որովհետև դրանք հաջորդող քայլեր էին Սահմանադրության փոփոխություններից հետո։ Սահմանադրությամբ նախատեսված է երկամսյա ժամկետ սահմանադրական մարմինների համար՝ Սահմանադրական դատարանի դատավորների թեկանածուներ առաջադրելու համար։ Եվ այդ երկամսյա ժամկետը հոսում է, ինչը նշանակում է, որ սահմանադրական մարմիններն արդեն մոտ ապագայում պետք է սկսեն ներկայացնել թեկնածուներին։ Իսկ օրենքի ուժի մեջ մտնելը նշանակում է, որ արդեն նախկին դատավորների կենսաթոշակի իրավունքները կկարգավորվեն օրենքով սահմանված կարգով։ Ինչպես նաև անհամապատասխանությունը Սահմանադրության և Սահմանադրական դատարանի մասին սահմանադրական օրենքում վերացվեց, որը հնարավոր չէր անել միաժամանակյա, որովհետև ԱԺ կանոնակարգ օրենքի համաձայն՝ մեկ օրակարգում հնարավոր չէր ներառել թե Սահմանադրության փոփոխությունների, թե Սահմանադրական դատարանի մասին օրենքի փոփոխությունները»,- ասաց նա։
