Այսօր լրագրողների հետ հանդիպման ժամանակ ժողովրդագետ Ռուբեն Եգանյանը խոսեց վերջին շրջանում արծարծված ամենաարդիական թեմաներից մեկի՝ արտագաղթի շուրջ: Մեկնաբանելով արտագաղթ և միգրացիա տերմինները՝ ժողովրդագետը նշեց, որ դրանք նույն իմաստն ունեն, միայն թե միգրացիա տերմինը արտահայտում է երևույթի երկու կողմը՝ էմիգրացիա և իմիգրացիա: «Հաշվի առնելով մեր պատմական անցյալը՝ խուսափում եմ արտագաղթ կամ գաղթ տերմինն օգտագործելուց և նախընտրում եմ արտահոսք բառը»,- նշեց Եգանյանը՝ հավելելով, որ արտահոսքը լինում է մշտական և ժամանակավոր:
Ըստ ժողովրդագետի՝ գոյություն ունեն միգրացիայի վիճակագրական չորս հետազոտություն, որոնք բոլորը մինչ այդ իրականացվել են միջազգային կազմակերպությունների ֆինանասկան օգնությունների հաշվին:
«Առաջին հետազոտությունը մարդահամարն է, երկրորդը միգրացիայի ընթացիկ գնահատումը, որի միջոցով գրանցվում են երկրից մեկնողներն ու ժամանողները: Սա հիմնականում չի կատարվում, այդ պատճառով չենք ունենում ճշգրիտ տվյալներ: Երրորդ տեղեկատվական աղբյուրը սահմանահատումների տվյալներն են՝ կատարվում է անձնագրի սկանավորում երկրից մեկնելուց և ժամանելուց: Վերջինը որակական ընտրանքային հետազոտությունն է, որի միջոցով ստացվում են և՛ որակական, և՛ քանակական տվյալներ»,- տեղեկացրեց ժողովրդագետը:
Նշենք, որ վերջին որակական ընտրանքային հետազոտությունը իրականացվել է 2007 թվականին ՄԱԿ-ի ազգաբնակչության հիմնադրամի աջակցությամբ: Ժողովրդագետը ներկայացրեց միգրացիայի վիճակագրական տվյալները, ըստ որ՝ 2002-2007 թվականերին երկրից մեկնել և չի վերադարձել 205 հազար մարդ, այսինքն՝ բնակչության 6,5 տոկոսը: «Սրանք շատ մտահոգիչ տվյալներ են և պետք է մտածելու տեղիք տան։ Դա պայմանավորված է տարբեր գործոններով, մասնավորապես՝ սոցիալ-տնտեսական, օրինակ՝ աշխատատեղերի պակասով»,- նշեց Ռ.Եգանյանը՝ ընդգծելով, որ մեկնողների մեծ մասը 20-50 տարեկան աշխատունակ տղամարդիկ են: Ժողովրդագետի կարծիքով՝ վերջին շրջանում միգրացիայի ծավալների աճին նպաստեց նաև քաղաքապետի՝ փողոցային առևտուրը արգելող որոշումը:
