РИА Новости-ի փոխանցմամբ՝ Ադրբեջանի արտգործնախարար Էլմար Մամեդյարովը ռուսական կողմին է հանձնել ղարաբաղյան հակամարտությանն առնչվող Ռուսաստանի նախագահ Դմիտրի Մեդվեդևի կողմից հակամարտող կողմերի ղեկավարներին հասցեագրած ուղերձի պատասխանը։
Այս մասին այսօր Մոսկվայում տեղի ունեցած մամլո ասուլիսի ժամանակ հայտարարել է Ռուսաստանի արտգործնախարար Սերգեյ Լավրովը.
«Այսօր Էլմար Մամեդյարովն ինձ հանձնեց այդ առաջարկի վերաբերյալ Ադրբեջանի նախագահի պատասխանը։ Մենք կասկած չունենք, որ ղարաբաղյան հակամարտության կարգավորումը հանդիսանում է տարածաշրջանային օրակարգի առաջնահերթություններից մեկը»։ Լավրովը նշել է, որ Մեդվեդևը դեռևս չի ընթերցել այդ տեքստը։
Մամեդյարովը հրաժարվել է հրապարակել նամակի մանրամասները. «Ես ամբողջությամբ չեմ հայտնում նամակի մանրամասները։ Այդ նամակը Դմիտրի Մեդվեդևին հասցեագրած իմ նախագահի նամակն է։ Ճիշտ չէր լինի նրա մանրամասների հրապարակումը։
Պետք է սպասել հայկական կողմի պատասխանին։ Ընդհանուր առմամբ, Կազանում արված հայտարարության համապատասխան՝ Ադրբեջանը գտնում է, որ առաջընթաց կա, այն տեսանելի է։ Իհարկե բոլորը կցանկանային, որ այն բեկումնային լիներ, սակայն ամեն դեպքում մենք աստիճանաբար և մշտական ռեժիմով առաջ ենք շարժվում։
Բոլորը հասկանում են, որ ներկայիս իրավիճակն արդեն չի գոհացնում կողմերից և ոչ մեկին, միջնորդներին՝ ԱՄՆ, Ռուսաստան, Ֆրանսիա։ Ներկայիս իրավիճակը սկսել է ձեռնտու չլինել նաև մեր հարևաններին։
Այդ համատեքստում մենք իհարկե պետք է առաջ շարժվենք, որպեսզի «օկուպացված» տարածքների, «էթնիկ մաքրումների», հարկադիր վերաբնակների ու փախստականների խնդիրները մնան անցյալում, որպեսզի դրանով իսկ հնարավորություն ստեղծվի մեր տարածաշրջանի, և առաջին հերթին Ադրբեջանի ու Հայաստանի համագործակցության, բարգավաճման ու զարգացման համար»։
