Հայ ազգային կոնգրես կուսակցության անդամներն ու համակիրներն այսօր Ցեղասպանության 99-րդ տարելիցի կապակցությամբ Սարյանի պուրակից երթով շարժվեցին դեպի Ծիծեռնակաբերդի հուշահամալիր:
Կուսակցության փոխնախագահ Լևոն Զուրաբյանը երթից առաջ լրագրողների հետ զրույցում անդրադարձավ հայ-թուրքական արձանագրություններին՝ դրանք մասնավորապես անվանելով «Ցյուրիխյան ուրացում»:
«Հայաստանը համաձայնեց մի փաստաթղթի, որով փաստորեն հարցականի տակ դրվեց Ցեղասպանության իրողությունը: Հայաստանը համաձայնեց Թուրքիայի հետ ստեղծել պատմության հանձնաժողով, որը կուսումնասիրի ցեղասպանության եղելությունը»։
Նրա խոսքերով՝ սա մի քայլ էր, որը և՛ բարոյական, և՛ քաղաքական տեսանկյունից անընդունելի էր․ «Սերժ Սարգսյանը սպասում էր, որ Թուրքիան կբացի հայ-թուրքական սահմանը, և Հայաստանի տնտեսությունը կզարգանա, բայց դա չեղավ: Թուրքիան խաբեց Հայաստանին՝ արձանագրությունները կապելով Ղարաբաղյան հիմնահարցի կարգավորման հետ»,- ընդգծեց Զուրաբյանը:
Ինչ վերաբերում է Թուրքիայի վարչապետ Ռեջեփ Թայիփ Էրդողանի՝ նախօրեին արված հայտարարությանը, Լևոն Զուրաբյանն ասաց․ «Ոչ ոք թող միամիտ չլինի և չմտածի, թե պատահական իրադարձություններ էին: Էրդողանը ոչ միայն ցավակցություն է հայտնել, այլև Սերժ Սարգսյանն էլ շնորհակալություն է հայտնել այն թուրքերին, որոնք այդ օրերին փրկել են հայերին: Բոլորս էլ հասկանում ենք, որ նման հայտարարությունները պատահական չեն, ակնհայտ է, որ տեղի են ունեցել հայ-թուրքական դիվանագիտական շփումներ, որոնց հետևանքով երկու կողմերը պարտավորվել են նման ռևերանսներ անել: Հայ-թուրքական հարաբերություններում սկսվել է նոր դիվանագիտական փուլ, որից երևում է, թե Թուրքիան ինչ է ստանում դրանից»:
Մանրամասները՝ տեսանյութում:
