Ադրբեջանական Trend լրատվական գործակալությանը տված հարցազրույցում ԵԱՀԿ գործող նախագահ, Լիտվայի արտգործնախարար Աուդրոնյուս Աժուբալիսը հայտարարել է, որ առաջնահերթ ու հասանելի նպատակ է համարվում հիմնարար սկզբունքների համաձայնագրին հասնելը և համընդհանուր խաղաղության պայմանագրի մշակմանն անցում կատարելը.
«Այդ նպատակը լրիվ հասանելի է, և կողմերը պետք է դա համարեն իրենց առաջնահերթ առաջադրանքը։ ԵԱՀԿ-ն նախկինի նման պատրաստ է աջակցել Մինսկի խմբի շրջանակներում և Ռուսաստանի, Հայաստանի ու Ադրբեջանի նախագահների եռակողմ ձևաչափով գործադրվող ամեն տիպի ջանքերին։
Թեև ոչ վաղ անցյալում Կազանի հանդիպումը չհանգեցրեց հիմնարար սկզբունքների շուրջ համաձայնագրին, ինչի հետ կապված մենք հույսեր ունեինք, ինձ նախկինի նման ոգևորում է այն, որ կողմերը հաստատեցին իրենց պատրաստակամությունը՝ բանակցային ճանապարհով խնդրի կարգավորման համար։ Պետք է հնարավորինս շուտ հասնել հիմնարար սկզբունքների համաձայնեցմանը»։
Աժուբալիսը կոչ է արել հարգել նախկինում՝ Սոչիում ու Աստրախանում եռակողմ ձևաչափով տեղի ունեցած հանդիպումների ժամանակ, ձեռք բերված պայմանավորվածությունները. «Հայաստանն ու Ադրբեջանը պետք է քայլեր ձեռնարկեն լարվածության նվազեցման համար, հնարավորինս շուտ իրականացնեն ռազմագերիների փոխանակում և հետաքննություն անցկացնեն շփման գծում գրանցվող միջադեպերի շուրջ, ինչպես նաև ամրապնդեն հրադադարի ռեժիմը և ռազմական ոլորտում վստահության ամրագրմանն ուղղված միջոցներ ձեռնարկեն։
Հարավային Կովկասի տարածաշրջանը կարևոր նշանակություն ունի ԵԱՀԿ ողջ տարածաշրջանի անվտանգության ու կայունության համար։ Ղարաբաղյան հակամարտության խաղաղ կարգավորումը բխում է մեր ընդհանուր շահերից և համարվում է մեր գլխավոր առաջնահերթությունը»։
