«Նախագահ Քոչարյանի ազատության հանձնախումբ» նորաստեղծ նախաձեռնող խմբի համակարգող Աղվան Վարդանյանը հայտարարում է՝ Քոչարյանի խափանման միջոցի փոփոխությունը հանրային պահանջ դարձնելու ճանապարհով են գնում և արդեն 60 հազար ստորագրություն ունեն:
«Ակնհայտ է՝ նախագահին ապօրինի կալանքի տակ պահելը ոչ մեկին պատիվ չի բերում, և ես գտնում եմ, որ սա նաև մեր պետության ամոթն է»,- ասում է Վարդանյանը։
Քաղաքագետ Արկադի Վարդանյանի կարծիքով՝ Աղվան Վարդանյանի՝ 60 հազար ստորագրություն ունենալու հայտարարություններն աճպարարություն են. «Արդեն հայտնի է, որ մի շարք շրջաններում դաշնակցականները փորձել են ստորագրահավաք անցկացնել՝ իբրև թե Շառլ Ազնավուրի անունով տուն-թանգարան ստեղծելու համար։ Այսինքն՝ մայմունությունն է հերթական։ Ինքն ասաց, որ հանրային քաղաքական ընդվզում է լինելու՝ ի պաշտպանություն երկրորդ նախագահ Քոչարյանի, բայց մենք դրա նշույլները հասարակության մեջ չենք տեսնում, ճիշտ հակառակ պատկերն է։
Իրականությունից հեռու, իրականությունից կտրված մարդկանց զառանցանքներ են, ուրիշ ոչինչ։ Դաշնակներն ո՞ւր էին, ի՞նչ էին անում, երբ իշխանության մեջ էին։ Պատասխանն ակնհայտ է՝ թալանով էին զբաղված»,- «Առաջին լրատվական»-ի հետ զրույցում ասաց նա։
Մեր զրուցակիցն ընդգծեց. «Այդ նույն մարդկային և քաղաքացիական իրավունքների ոտնահարումներով ու վայրագություններով էին զբաղված դաշնակները, իսկ հիմա պուպուշիկ տեսք են ընդունել ու վեհ գաղափարներից են խոսում։ Բայց նրանք չեն հասկանում, որ վեհ գաղափարներն ու Քոչարյանի պատկերն ընդհանրապես անհամադրելի են»։
Հիշեցնենք՝ այսօր նաև հայտարարություն են տարածել մշակույթի 60-ից ավելի գործիչներ՝ կոչ անելով փոփոխել երկրորդ նախագահ Քոչարյանի խափանման միջոցը։
Արկադի Վարդանյանի դիտարկմամբ՝ թե՛ Դաշնակցության և թե՛ մշակույթի, այսպես կոչված, գործիչների բոլոր ջանքերն ապարդյուն են. «Այդ ի՞նչ երգիչներ են, ի՞նչ գիտնականներ։ Արմենն ու Հայկոն ովքե՞ր են, այդ ռաբիսներն ի՞նչ հեղինակություն ունեն հասարակության մեջ։ Նրանց հեղինակությունը զրո է և եթե նույնիսկ նրանց հետ համաձայնության են եկել, ապա դա ոչ այլ ինչ է, քան հերթական պատրանք ստեղծելու փորձեր։ Նրանք իրենցից ոչինչ չեն ներկայացնում»։
Քաղաքագետը հավելեց. «Սրանց վայրահաչություններին, զառանցանքներին ընդհանրապես ուշադրություն պետք չէ դարձնել. եթե փողոցում քայլում եք, անտեր շունը հաչում է, հո ուշադրություն չե՞ք դարձնում, չեք կանգնում, չէ՞, նրա հետ զրույցի բռնվում ու ինչ-որ բան փորձում բացատրել։
Հիմա էլ նույն իրավիճակն է, և նույն տպավորությունն են նրանք ինձ մոտ թողնում»,- եզրափակեց Արկադի Վարդանյանը։
Լուսանկարը՝ Photolure-ի
