«Ռեստարտ» նախաձեռնության անդամները հավաքվել էին ԱԱԾ շենքի դիմաց՝ հայտարարելու նոր նախաձեռնության մասին: Այս առիթով «Առաջին լրատվական»-ը հյուրընկալել է «Ռեստարտ» նախաձեռնության անդամ Դավիթ Պետրոսյանին և «Քաղաքացու որոշում» կուսակցության գործադիր մարմնի անդամ Գարեգին Միսկարյանին:
Ինչպես նշեց Դավիթ Պետրոսյանը՝ հեղափոխությունից հետո իրավապահ մարմինների նկատմամբ հասարակության վստահությունը չի ավելացել, նույնիսկ հակառակը. «ԱԱԾ-ն շատ մարդկանց մոտ շարունակում է ընկալվել ինչ-որ անհասկանալի գործունեությամբ զբաղվող կառույց: Նույնը կարող ենք ասել ոստիկանության, դատական համակարգի մասին: Եվ եթե երկրում իրավական մարմինների նկատմամբ ժողովրդի վստահության մակարդակը ցածր է, այդ երկրում չեն կարող լինել տնտեսական, կրթական ռեֆորմներ, և սա բերելու է ավելի մեծ խնդիրների, քան հիմա կան»:
Մեր զրուցակիցն անդրադարձավ անպատժելիության մթնոլորտին և ատելության խոսքին. «Այն, ինչ կատարվում է սոցցանցերում՝ հայհոյանքները, վիրավորանքները, զրպարտությունները, գալիս են անպատժելիության մթնոլորտից: Խնդիր են արդեն ոչ թե դրանով զբաղվող մարդիկ, այլ այն մարդիկ, ովքեր թույլ են տալիս նրանց այդպիսի գործունեությամբ զբաղվել: Սոցցանցերում առկա ատելության մթնոլորտը նաև դուրս է եկել սոցիալական ցանցերից, և արդեն փողոցում են քաղաքացիներին սադրում, հայհոյում»:
Դավիթ Պետրոսյանի խոսքով՝ եթե տեղի ունեցածին իրավաքաղաքական գնահատական չի տրվում, խնդիրը համակարգային լուծում չի կարող ստանալ. «Երբ չկա գործողությունների ծրագիր, պարարտ հող է ստեղծվում, որ ժողովրդի մեջ կասկածներ առաջանան: Պետք է իրականացվի նաև լյուստրացիա, որովհետև մինչև մեր անցյալին գնահատական չտանք, մինչև մեր սխալները չընդունենք՝ մենք ո՛չ ներկան կարող ենք գնահատել, ոչ էլ կարող ենք պլաններ կազմել ապագայի հետ կապված»:
Գարեգին Միսկարյանը ևս կարծում է, որ առաջին հերթին պետք է լյուստրացիա իրականացնել դատական համակարգում և ուժային կառույցներում. «Դրանք այն կառույցներն են, որոնք ժողովրդի վստահության առավել անհրաժեշտությունն ունեն: Իսկ առանց լյուստրացիայի, գոնե մասնակի լյուստրացիայի, ժողովրդի վստահությունը անհնար է վայելել: Բայց ես կարծում եմ, որ ներկա կառավարող ուժը որոշակի մտավախություններ ունի, այդ պատճառով էլ այդ խնդիրը քաղաքական դաշտում չի արծարծվում»:
Նրա խոսքով՝ այն ատելությունը, որն առկա է սոցցանցերում, քայքայելու է մեր պետությունը և «այն փոքրիկ ձեռքբերումները, որը մենք զոռով պահում ենք»:
Հարցազրույցն ամբողջությամբ՝ տեսանյութում:
