ՀՀ նորանշանակ վարչապետ Հովիկ Աբրահամյանը որոշել է իր գործունեությունը սկսել քաղաքական հայտարարություն անելով և առաջինն է անդրադարձել «հրաշալի քառյակին» ուղղված ՀԱԿ հայտարարությանը, թե հայտնի քառյակի հիմնական խնդիրը պետք է դառնա նախագահ Սերժ Սարգսյանի հեռացումը։
Թե ինչու է Աբրահամյանը որոշել քառյակում ներկայացված քաղաքական ուժերի փոխարեն պատասխանել ՀԱԿ-ին՝ առաջին հայացքից անհասկանալի է: Առավել հետաքրքիր է, թե «հրաշալի քառյակի» ո՞ր ուժի փոխարեն է որոշել ՀԱԿ-ին պատասխան տալ Հովիկ Աբրահամյանը՝ «Ժառանգությա՞ն», ՀՅԴ-ի՞, թե՞ ԲՀԿ-ի:
Tert.am-ի հետ զրույցում Հովիկ Աբրահամյանի արած հայտարարության տեքստից երևում է, որ նա ավելի պատասխանում է ԲՀԿ-ի փոխարեն՝ այն դեպքում, երբ ԲՀԿ խոսնակ Տիգրան Ուրիխանյանն ասել է, որ պատասխան չունի, քանի որ քաղխորհրդի նիստ չի եղել:
ԲՀԿ-ն պատասխան չունի՝ փոխարենը պատասխան ունի նորանշանակ վարչապետ Հովիկ Աբրահամյանը, ով հայտարարել է՝ «եթե առանձին մարդկանց թվում է, որ ոչ ոք չի նկատում տողերի մեջ թաքցրած՝ սեփական ուժերից վեր ամբիցիաները, և որ իրենք կարող են ուրիշների ձեռքով իրենց համար կարկանդակներ հանել, ապա իսկապես սխալվում են:
Ժամանակները փոխվել են. մեր հասարակությանը հետաքրքրում է առկա խնդիրներին լուծումներ տալը, բոլորի ուժերի միավորումը սոցիալ-տնտեսական վերելքի համար, ոչ թե տարբեր ժամկետանց խարդավանքներին հետևելը: Չարությունն ու նենգությունը պետք է սահման ունենան, ծերությունը պետք է արժանապատիվ վայելել, ոչ թե շարունակել անել ամեն ինչ, որ Հայաստանում վատ լինի»:
Արդյոք սա գալիս է հաստատելո՞ւ տեղեկությունը, որ Հովիկ Աբրահամյանը վարչապետի պաշտոնը ստանձնել է ԲՀԿ-ին քաղաքական ու ընդդիմադիր ամբիցիաները ստանձելու մասով որոշ պարտավորություններ իր վրա վերցնելով՝ դժվար է ասել:
Պատկերն առավել պարզ կլինի, երբ Հովիկ Աբրահամյանի կառավարության ծրագիրը ներկայացվի ԱԺ հավանությանը: Այդ ժամանակ ԲՀԿ քվեարկությունը շատ բան ցույց կտա:
Ընդ որում՝ Հովիկ Աբրահամյանը «սպառնացել» է «կրկնակի ավելին համագործակցել» ԱԺ գործընկերների հետ:
«Գիտեք, Ազգային ժողովում ես բավականին արդյունավետ համագործակցել եմ նույն ՀԱԿ-ի պատգամավորների հետ, ու միասին բազմաթիվ օրենսդրական նախագծեր ենք ավելի լավը դարձրել կամ զարգացմանը տանող նախաձեռնություններ ենք իրականացրել: Վստահ եմ, որ նույն Գագիկ Ջհանգիրյանի, Հրանտ Բագրատյանի, Լյուդմիլա Սարգսյանի, Արամ Մանուկյանի և մեր մյուս գործընկերների հետ մենք դեռ շատ դրական գործեր կանեինք, եթե ես մնայի Ազգային ժողովում: Բայց ավելի քան վստահ եմ, որ հիմա այդ համատեղ աշխատանքը կրկնակի ավելի օգուտ կարող է բերել մեր երկրին, ու ես անպայման փորձելու եմ կրկնակի ավելին համագործակցել ԱԺ իմ բոլոր գործընկերների հետ»:
